অহ্’বে কি তুই মর রাধামন (চাকমা কবিতা)

– সুজন চাকমা (জুম্মধন)

জুম্মো দা, অহ্’বে কি তুই মর
আওজোর-পরানর রাধামন?
অহ্’বার চাং মুই তর ধনপুদি
যুনি পুরে দোচ্ মর সবন;
মেয়ে দিম, কোচপানা দিম
তরে, অঝার বুক ভরন।

বুনি লোম তরে মুই আওজে
রেঝম খাদির রাঙা পেলোত্,
কাবর’ লাঙ্ ওহ্ই লঘে থেবে
বাজিনে ম খাদি পেজোত্।

ধারাচ্ গরং বানা মুই তরে
ছাবা ওহ্ই যুনি তুই থেদে,
ত জাত্ ভোন জুম্মবীর কানানি
যুনি একবার ভাবিদে;
চোঘোপানি চেই থে ন পাল্লেন
যুনি খামাক্কাই কোচপেদে।

বুক বানিম মুই কা আঝায়
নহ্ বুঝোচ্ যুনি ম মনান,
আহ্’মিজে ডর দি-ঠেঙ্যে বাঘর
দুঘুত দুঘুত নিত্য পরানান।
অহ্’বে কি তুই মর রাধামন
ওহ্দুং মুই তর ধনপুদি,
কোচপানা আ জাদর কধা
শুনেবে মরে পুদি পুদি?

কোচপানা শিঘেবে তুই মরে
ছড়া পাড়ত্তুন তুগুনোত্,
এগত্তর অহ্’বং নুও গরিনে
এযেত্থে ফাগুনোত্।
মানা তরে নহ্ গরিম মুই
জাত ভালেদি কাম গত্থে,
গরচ্ অহ্’লে ওহ্’ম সমারি
বুক পাদি দিম তুই মত্তে।

তুই বানা মরে কধা দে
পুরেবে ভিলি মর সবন,
বানা একপল্লা জোপ দে
অহ্’বে কি তুই মর রাধামন?

অহ্’বে কি তুই মর রাধামন

✍️ ২১/০৮/২০১৮

Spread the love
RannyePhul

Explore Chakma Literature, Culture & History

https://rannyephul.com

Leave a Reply

Your email address will not be published. Required fields are marked *