আত্তুবো আঝা (চাকমা গল্প)

ঘন্টা বাজি যিয়েগোই। তারেঙে এঝ’ ল্যাবরেটরিত কি এক্কান গরের। বেঘে নিগিলি যেওন, মাত্তর তে এঝ’ আঘে। তে এভিও মিটারবোলোই কি এক্কান টেস্ট গরের। রানজুনি বারান্দাত্তুন আর’ ভিধিরে সুমিল’। কলেজত ক্লাস চলিবো। ( আত্তুবো আঝা ) প্রাকটিক্যাল ক্লাস্সো বেন্যা মাধান অয়। রানজুনি তারেঙরে তোচ্ছে ন’ লাগেনে অলরগোরি তারেঙ’ কামান চেই আঘে! তারেঙে তারানি টেস্ট গরের, অক্তে অক্তে সোল্ডারিং আয়রন্যলোই তারানি ইওত্তুন উবোত, উবোত্তুন ইওত ঝালাই গরে। বেটারিবো তারান হোগে যিয়ে সিয়ান সোল্ডারিং আয়রন্নুলোই লাগানার পর উগোরেদি পাঙ্কাগান গুরের। সেক্কে তারেঙর মনান হুঝিয়ে কি এক্কান বোঝায়! সেক্কে তারেঙর চোঘে মুয়ে হুঝির বান বায়।

প্রাকটিলর জিধুবো ক্লাঝত যেবাত্তে কল’। তারেঙর কন’ উচ নেই তে তা ধঘে তে কাম গরের। নতা সমারে রানজুনি আঘেদে সিয়ানও কোই ন’ পারে। মাত্তর রানজুনি তা’ কামান তা এন্ড্রয়েট ফোনান্দোই ভিডিও গরের। প্রাকটিক্যাল’ রম্মো চুবি থেয়্যে জিধুবোর কধায় তারেঙে তা’ সজপদরানি ব্যাগত ভোরেই আধা ধোরিল’। রানজুনিও তাসমারে সমারে আধা ধোরিল’। তারেঙ?

– কি? তুই য়ুত কি গরত্তে?
-ক্লাস গোরিবাত্তে তরে দাগা ইচ্ছোং।
-তে ন’ দাগিনে, আয়ে অলর গোরি রোওচ?
-আ তুই কাম গররনি সেনে ।
– ক্লাস দ’ য়েধক্কন আরগানি অব’।
-তুইনাচে ভাবনা গরেদেসান কি সাদারাগাদারা গোচ্ছোস!
-ইয়ো ইয়ো সাদরাগাদারা ন’ কবে।
-তে কি কোধুং?
-এক্সপেরিমেন্ট কবেদে।
-আয়ে? হা হা।
-মুই সিয়ান ড্রোন বানাঙত্তে। বুচ্ছোস?
-অ’ বুচ্ছোং। তে সিয়ান কি গত্তে?
-মুইদে, মুই বিজ্ঞানী অম্বে।

পেজিক্সর বোইবো হুলিনে নিউটনর সূত্রগুন পড়ের তারেঙে। তা ধাঘত রানজুনি বোই আঘে। রানজুনি কানত ইয়ার ফোন লাগেই তারেঙ্গের কামাানি চার। চাধে চাধে এক্কা এক্কা আঝে। তারেঙ, ঘিচ্চেকগোরি তুই বিজ্ঞানী ওই পারিবে। তুই দোল কাম গরচ।

-সাধুবাদ, তে তুই কি অবে?
-মুই তর লাইভ এসিস্টেন্ট ওম্বে।
-কি?
-ঘি।
– এ অক্তত সদান ন’ গরিচ। ভুক হেবে।
– হা হা হা, ওক্কে। সদান ন’ গরিম। মাত্তর…..
-মাত্তর কি?
-ত’ এ ভিডিওয়ান?
-ভিডিও? কি ভিডিও, ঝাদি ক’।
-অধে, মুই তরে ভিডিও গোচ্ছোঙ।
-কেত্তে ভিডিও গোচ্চাচ?
– মনে কোয়ে সেত্তে, মুইও বানেবাত্তেই।
– য়ান যুনি তারা পান সালেন………।
-সালেন কি?
-খর ন’ পাঝ?
– নাহ, খর ন’ পাং।
-মরে মারে ফেলেবাক।
– আয়ে মারে ফেলেদাক?
– ন’ বুঝিলে নেই।

তারেঙে তা ‘তুগুন’ ড্রোনান বানে ফোরেয়ে। আদামর এক্কান জাগাত সিয়ান দেগেব’গোই।  আদামর কিঝু গাবুজ্জে, পরবাপ্যে, বুড়ো. গুরো এগত্তর ওইওন। সিওত রানজুনিরেও তে দাক্কে আ কলেজর কিঝু সমাজ্জে। বেঘে সেবাত্তে আওল-পাওল ওই আঘন। তারেঙে তা “তুগুন” ড্রোনান পল্যাদি বেঘরে দেগেল’। কয়েকজনে ন’ উড়িবো ভিলিনে কয়োন। মাত্তর তারা কারর কধাত মন ন’দিনে তারেঙে তা বানেয়্যে ড্রোনান উড়েই দিল’। ড্রোনান ঠিঘই উড়ের, তা ড্রোনান উড়োদে দেগদে চিগোন গুরোগুন কোবোলো গত্তন তারেঙ্গেদার হেলিকপ্টার সগান উড়েত্তে উড়েত্তে। সিদিন্যে তারেঙ্গে বেঘ মুজোঙে বিজ্ঞানী অব ভিলিনে কল’। তা সমারে রানজুনিও কল’ আমা জাদত বিজ্ঞানী, কবি, সাহিত্যিক লাগিবাক সেত্তে তারেঙ্গের এ আঝাগান তুজিম ওক মুই গোজেনত্তুন তবনা গরঙ। তুমি যারা য়ুত থোবেও তুমিও তা’ সান্যান বিজ্ঞানী ওবার চেও। সেলঘে তারেঙর বেঘ কলেজর সমারুন আত তালি দিদি তারেঙরে মুজোঙো দিনর বিজ্ঞানী ইঝেবে গোঝি লুইওন। তারার সমারে আদামর বেঘেও আত তালি দিনে তারেঙর দোল কামত্তে সাধুবাদ জানেওন।

ফাঙ গোরি উক্কো আবাজ অল’ তারেঙর ড্রোনান মাদিত গোচ্ছে পুরিল’। বেঘে দরে ধাদন, ইবে দ’ বুন্দুগো আবাজ। যে আবাঝে পরান কারি নেযান। যে আবাজে সবন ভাঙিদোন, যে আবাজে লো নেগেদোন। বেঘে দেওন মাত্তর রানজুনি তারেঙর সমারে আঘে। আরোক্য আবাজ অল’ যে আবাজে তারেঙে গোচ্ছে পল্ল। তারেঙে রানিজুনিরে ধেবাত্তে কল’ মাত্তর রানজুনি ন’ ধেল’। রানজুনি তারেঙরে তা করত পোরেয়ে, কেয়ো তা কায় নেই উন্দি সিদিরেগুন এত্তন। তারেঙে কল’ রানজুনি ম’ সবনান দ এচ্যা সবনই থেই গেল। ম’ আঝাগান দ’ এচ্যা আঝাই থে গেল’। মুই দ ’ বিজ্ঞানী ওই ন’ পারিলুং। তুইও ম’র লাইভ এসিস্টেন্ট ওই ন’ পারিলি। আদেক্যাগোরি আরোক্য ফাঙগোরি আবাজ অল’ যে আবাজে রানজুনিও মাদিত ধুলি পল্ল। মাত্তর রানজুনি তারেঙরে কল’ তারেঙ মুই দ’ ত’ লাইভ এসিস্টেন্ট ওই ন’ পাল্লুং মাত্তর ত’ সমারে মরি পাল্লুং। দুনুজনর দিচোঘো পাদাত ধারা ধারা চোঘো পানি বেই পরের গাল’দি। আঝাগান আঝাই থেই গেল’ তারা দুনুজনে মাদিত গোচ্ছে পল্লাক। সেক্কে তারার আর মাদ নেই, মাত্তর চিদিরেগুন তারার কিয়েত লাদি মাত্তন। হারামজাদা, হারামজাদি…………………….

আত্তুবো আঝা

গল্পকার: বিকেন চেগে

✍  ০৩.০৫.২০১৭ ইং

Spread the love
RannyePhul

Explore Chakma Literature, Culture & History

https://rannyephul.com

Leave a Reply

Your email address will not be published. Required fields are marked *