ইরুক ধনপুদি (চাকমা কবিতা)

– সুজন চাকমা (জুম্মধন)

নাক্সা ফুল চিনচ্ নাক্সা ফুল?
ধনপুদির চুলঝুদোত্ গুজেয়ে নাক্সা ফুল।
জুম্মো দা, মুইও গুজেবার চাং সে দোল ফুল।
তুই কি মরে আনি দি পারিবেগোই-
মুরো উদি মুরো লামি, ছরা-গাঙ্ পার ওহ্ই?
মর মনে অহ্য়- তুই পাত্তে নয়, পাত্তে নয়।

তুই কি কচ্ কিজেনি জুম্মোবী
ভারি পিত্তোমরা ভাবচ্ নাকি?
একদিন দে’বে সাত গাঙ্ সাজুরি
আর মোন-মুরো ঊজুরি-
আনি দিম্মোই নাক্সা ফুলত্তুন বেচ্ দোল
খুঝিয়ে অহ্’বে তুই ওলোজোল্।
সেক্কে তেহ্ ক’বে স্যা-
ইবে না মর পরানর ‘রাধামন’ জাত্যে।
যে রাধামনে বানা ধনপুদির লাঙ্যা ন এল
গোদা চাঙমাউন’মায় ঝাকবাঝা কজাল এল
এল বিজয়গিরি রাজার বেগ’ ডাঙর সেনাপদি।
যে মানুচ্ছো কোচপানালোই জয় গচ্ছি-
মান্যর মন, তা নাঙ্ অহ্’ল রাধামন।

মনে মনে ভাবি যাং
ইরুক ধনপুদিরে মুই তগাং;
কন’দিন যুনি পাং জুম্মদেঝর লাঙেলত
চেঙে, মিগিনী, কাজলঙত্,
সালেন বিজয়গিরির নুও যুক(যুগ) এব’
জুম্মোদেচ্ হিল চাদিগাঙত্।

জুম্মো দা,
অহ্চ যুনি তুই এ যুগোর রাধামন
থাই যুনি তর কোচপানা বুক ভরন,
মিঝে নয় সিঝি যে কোচপানানি
সালেন, এগেমে কঙর তরে –
ওহ্’ম মুই ইরুক যুগর ধনপুদি।
পুরি ন ফেলাং, পুরি ন ফেলেম
জাদর রীদি সুধোম, সচপদরানি।
যুনিও মুই মডার্ণ যুগর পোঝাক্ উরিহ্ পাং
পিনোন-খাদি, রুবোরাদি পুরি দ ন ফেলাং।
যেক্কে দেঘং তরে ধুদি পিন্যে আ খাদি সিলুম উছ্যে,
মনে অহ্য় পুরোনি দিন মাধান ফিরি এচ্ছি।
সুক্কানও ফিরি এব’ পারাপাং আমা জাদ’মাই
দিন কাদাঙর মুই ম রাধামনরে বাচ্ছে থানাই।

ইরুক ধনপুদি

✍️ ৩০/০৮/২০১৮

র’ ভাঙোনি: কজাল – রম’চক্র, বীর। ইরুক – বর্তমান, অধুনা।

Spread the love
RannyePhul

Explore Chakma Literature, Culture & History

https://rannyephul.com

Leave a Reply

Your email address will not be published. Required fields are marked *