উল্লোহ্ (চাকমা কবিতা)

– বিকেন চেগে

তুমি যেধক মাতবন্ গোরিবের মু চিবে দিভা
সেধক মুই রিবেঙ গিরগ্রে রেঙ দিম,
জোগার পারিম, মাদি উদিম মুই, তাদি উদিম
তোমারে ন’ মানিম মুই, তমা শাজন ন’ মানিম।
ম’ মাভাঝে মাদি, জাদ রীদি মানি চুলিম মুই
ধুরি রাগেম গোজ্জে যাঙ যাঙ জাদত্যরে মুই,
এগত্তর গোরেম জুদো উয়্যে জাদ ভেয়োর মনরে
লারমাসান লাড়েয়ত ডাগোনি দিম জাদর বন্দায়’রে।দেবা কানাগোরি তুবোলর ঝর এযোক
দিন, রেত মনে কলে এক ওক, এক ওক
এযোক ঘরভাঙোনি বৈজেগর কালা ঝর
তুয়ো ইরিদুঙ নই জাদ বাজোনির লড়।
মানিদুঙ নই আর্ তমা শুচ্ছে শাজন রীদি
ভাঙি যেব’ ভাঙি যেব’ তমা শুচ্ছে শাজন জাধি!
লো য়েরালোই বানেয়ি এ কিয়েগান মর
মানি দ’ নই আর বেআইনী শাজন তর।ভাঙি গেলে যোক আধ, থেঙ কিয়ের কত্থা
ইরিদুঙ নই মুই, ইরিদুঙ নই এ আয়োজর জাগা
পিত্থিমি চিন’ভিলিনে য্যানপাই গোরিবা,
মা-ভোনর লাজ আনঝুর মঞ্জোক্কা কারিবা!
য়ান কেনে মানানা, কেনে মানি নেযানা
লো থাক্কে কেত্তে তাদি ন’ উদানা, শোল ন’ মাদানা?
পাত্থর ভাঙদে ভাঙদে পাত্থর উয়্যে কিয়েগান
উজু-বেঙা লাড়ে অব’ জিদি লোম মরনান।
মানিদুঙ নই মুই তমা লোখেয়্যে বজঙ শাজনান
তাদি উদিম মুই, মাদি উদিম, জোগার দিম…

উল্লোহ্

✍ ০২.১০.০১৬ইং

Spread the love
RannyePhul

Explore Chakma Literature, Culture & History

https://rannyephul.com

Leave a Reply

Your email address will not be published. Required fields are marked *