এক ফুদো রোদ (চাকমা কবিতা)

– বাসু দেব চাকমা

এক ফুদো রোদ,
লাঙোনির গালনত পুরি
লাগা লাগা চুলানি ফারি
ছিদে সোনা রঙ!
ইত্তুক নুদি আঝি আঝি
চোগো ইজিরেই লাঙোনি
বারবার হারি নেজাই মন।

এধক দোল!
এক ফুদো রোদ,
যেন অজল মৌনো চুগোত
এক ফুদো শিরো পানি লাজুরি ফুলোত!
গালানত পুরি ওলোদোর সোনা রঙ
ফুলোত বজা হন হেজ হুমোরী,
সোনার পোইধে বেই
যেন লামি এজে মুজুঙোত
তে ম লাঙোনি রাজ হুমোরী।
তা রাঙোচ্চে হালা চুলানি
যেক্কে হুজি হুজি বোয়েরত ঢুলে,
ঝোলগা ঝোলগা গম লাগানা
সাত আদাম ফারি ম-দু এজে ভুলে।

সাত তো নাকশা ফুল
সাত রেজ্য ফারি আনি দিম
লাঙোনি তুই হলে,
চুলোত গুজে দিম ইক্কো ইক্কো গুরি
হোচপানার মিজেলে।
বানা পত্যার বেল পহরত
পত্থম সোনালি ছদগত নোনাবী
আমক ওই মুই চে থেম তরে,
মুজুঙো মুজুঙি ওই চোগে চোখ রাগেম
হমরত বেরে ধুরিম তরে!
উদে উত বাজে তুম্বাজ ইক্কো দিম
এক ফুদো রোদ
লাঙোনি ত গালানত পলে।

Spread the love
RannyePhul

Explore Chakma Literature, Culture & History

https://rannyephul.com

Leave a Reply

Your email address will not be published. Required fields are marked *