এঝচ যুদি তুই (চাকমা কবিতা)

– সুজন চাকমা (জুম্মধন)

ম কোচপানার তুগুনোত উধোচ যুদি তুই
সালেন, লাঙর সাঙু পাজ্যে দিম তত্তেয়।
লারেহ্ লারেহ্ তুই বেএই উধিবে
সেক্কে তিনেঙো হাবা বেই যেব অজিরেন।
ফুরোমোনে পিঝুম গরিবু, বরগাঙানে ধুমুলুক খেলিবু
পিঝুম গরোদোক, ধুমুলুক খেলোদোক
বিজিদি যেই তুই ন হোচ দিককাবুলো।

এঝচ যুদি তুই ম মনর জুম চাবত
কোচপানার বিজ-বিজিদিউন ছিদিবং
অকথে-বেঅকথে ফাগুন আনিবং
রোদে-ঝরে গেজেই উধিবাক চারাউন।
ছাবা সান লঘে থেবে তুই সপ্পানত।

এঝচ যুদি তুই রাঙোস্যে এক বেল্যে মাধানত
থোই দিম আক গরি ইজোরত গপ দেনা খেন,
থোই দিম বস্তিত্তুন বেল দুবোন্দি দেঘানা খেন,
নিজেনিআনি যত্তনে থোই দিম মুই কবঘত।

আর এঝান এক সবনও মুই দেঘং-
যে সবনত বানা তুই আর মুই বেরের
এক পাক এক পাক গরি পেধেল মারির
চা’চি গরিহ্ কধা কোহ্ই যের আর যের
থুম নেইয়ি একখান পধত ল্হুমিবং।

কধার ফুল তুই ফুদে যেবে নিচিদেয় অনঝুর
কধার ফুলুন সাজেই গরিম মুই কবিতার চাচ
সেই কবিতাত্তুন ন্হিগিলিবো কোচপানার তুম্বাচ
তুম্বাজে বারবার হব আম্হা দিজনর মনজুর।

জুন্হি রেদোত পরি থেবে তুই ম করহ্ত
নিবিলি কুঝি চুলানিলোই খারা খেলেম মুই
বিদি যেয়ি কধানি হিধোত তুলি হাঝিবে তুই
মুই দুবি যেম নুও গরিনে গভিনত্তুন গভিনত।
কি একখান বুঝেয় ন পাচ্ছি সুঞ্জুক ফুদিবু
রগে রগে কোচপানা যেই ল্হুমিবো পাচপরানত।
উধোচ যুদি ম কোচপানার তুগুনোত
এঝচ যুদি তুই ম মনর জুম চাবত।

এঝচ যুদি তুই

✍️ ৬/০৫/২০২১ খ্রি.

Spread the love
RannyePhul

Explore Chakma Literature, Culture & History

https://rannyephul.com

Leave a Reply

Your email address will not be published. Required fields are marked *