কধানি জমে থোচ (চাকমা কবিতা)

– ম্যাকলিন চাকমা

মুই কি ভজান দেরি গরি এ্যালুঙ?

না, নয়। সত্তর’ বঝর বিদি যানা
সিয়ানরে কি দেরি কুও যায়?
আধা পধত থামি থানা অক্ত
সাঝি নালত পানি ফুদোর পানি র’,
মনর তিরোচ হুরি পেলেই
আনুদোর অক্ত কাধেয় দেনা।
সাঙু দোরত বঝি কিঝু কিঝু দিন গঙানিত
আঝায় আঝায় চেই থানা
সত্তর’ বঝর কিচ্ছু নয়।

তর কি এভ জুনপহ্’রর কধানি ঈধোত উধে?
মনত আঘে এ্যাকবার
জুনপহ্’র জাগোনিত কল’গর
চাম্বাফুল গাচ্ছোত ধলপহ্’র অহ্’য় সঙ
কোচপানার কধানি ধাগাধাক্যে
ধেলান দি কধক কো’বুলো গত্থঙ?

সিয়ানি কি হুরি পেলা যায়?
ঠেঙত হারু পিনি এ্যালে, বুগত টেঙাছড়া আা
আহ্’দত কোজোই, এ্যাহ্’ল হাদি বুগত বানি।
মর কোজোলি থরি ন পারি গোদা রেত
কোচপানার কধা কোয় কোয় কাদে দেনার
দিনুন হুরি পেলা ন যায়। খালিক, তুই আহ্’জি
গেলে মরেহ্ কিচ্ছু জোপ ন দি।

সিয়ান কবাত্তেই মুই ত সিধু এ্যালুঙ।
সত্তর’ বঝর সঙ মনান ধেরধেচ্যে গরি রইয়্যাহ্,
বুগত লাগারাক দ্বে যেইয়্যা মন খুলি কধানি
কোয় ন পারি। তুই কি এভ কবিতে রঝাচ?
লাঙেল্হে লাঙেল্হে, তুগুনে তুগুনে দিবুজ্যা
মাধান ভরন্দি বেল আগাঝত উধিলে।

এভ মুই তুগুনে তুগুনে
লাঙেল্হে লাঙেল্হে বেরাং।
এভ’ পেগর তামাঝানি চেয় চেয়
দিন কাধাং। বরগাঙান সাঙ।
কেনে ভালুদ্দর দূরত গঙে যায়।
সেমে তুলানি উড়ি যাদে ধরিবের চাঙ।
কবিতে রঝাং। অঝার কবিতে।
মনর দুয়ারত থেবরক খায়।
মর মনর অঝার বুব’ সমন
লাগারাক দ্বে যেয়্যা কধা কঙ
কলমর কালিত।
কবিতে লেগঙ তরে ঈধোত তুলি,
বাঝি বাং সুগ দিন মনত তুলি।

পরান… ও পরান
ইঁ..।

তুই কি এভ রেত জাগি জাগি
জুনিপুক্কোই খারা খেলচ?
এভ’ কলগত ঝাকবানি দুমুরোচ?
চেরে পুক ডাগোনির দিবুজ্যা
মরে ভাবি ভাবি চোগো পানি থেবায়?
পরান্নে… ও পরান্নে আহি ন মাধচ?

শুনঙর তুঙ।
ভাবঙ আঘ দিনুন।
মনান আর আঘ’ সান ন’ কানে আর।
সে অক্তউন দিবে দ্বে যেওন।
অক্থউন আগ সান কধা ন কন।
ভাবোনি ন এঝে আর কাদি যেইয়্যা
কজমা দিনুনোত নিলোজত পরি।
ন অহ্’য় আর কন’দিন মনর
কলগত ফিরেনা।
কাদাকাত্যে মনভুয়োত
সাদাঙা ওই বাজি থানা।

বেল ডুবি যার।
অক্থআন সাদাঙা অহ্’র।
ভালুদ্দুর পহ্ত।
গাউলি গম থেচ।
কনদিন দেগা ন অহ্’ব।
কধানি জমে থোচ।

Spread the love

Leave a Reply

Your email address will not be published. Required fields are marked *