কোচপানা গিরেহ্ বানোক (চাকমা কবিতা)

– মেয়েেরেগা

কাজা আঘুনোত পরি মুরি ন পারিম
তরে কোচ পাঙ ভিলি,
নিয়োমর বাহ্’রে অনিয়োম গরি ন পারিম
তরে পেবাত্তেই ভিলি।
তর সদেসত্ মাঘানা রাঙা রাঙা সবন
ন পারিম পুরেই দি, চেচ্টাও গত্তুঙ নয়
মর ইঞ্জেবে পরান মানা গরি উধে
মর আক্কলে আকসোই ধরে।
সাধ্যর বাহ্’রে যিয়েন, সিয়েন ন চেচ
কোচপানা নাঙে মরে অহ্ঙরা ন পিদেচ
মুই এঝ’ ভজমান গম আঘঙ
মা বাব’ কধা ধরঙ মানঙ, বরজনরে গরঙ সম্মান,
মা বাবর লোক্খি পুও লোক্খি থেবার চাঙ
অলোক্খি অহ্বার মরে জিত তুলি ন দিচ;
পোরেয়ের সুকদুঘোত এঝ’ চোতপোত্যে
চিত নেইয়ে পর মারানাত মরে ন কাত্যেচ
কোচপানা সুও দি মরে চিগোন ন বানেচ
মা বাবর টেঙা মারি খেয়ে বেআক্কল ন বানেচ।
তুই ন চেচ মত্তুন লাক টেঙার বান্ডিল
ন মাঘিচ নিত্তো ইভে উভোন
লাঙর দায়ে অসত ওহ্’ম!
তুই কেনেহ্ গিরিত্থি ধরিবে এক অসত লাঙ্যারে।
বেক সুক্খানি টেঙাত ন থায়-
ধন সম্পত্তির সেরে; আঝল সুক সে তিত্তিত
মনে মনে যুনি সাং খেলে।

খবর পাহ্ঙ্ ঈরুক যুগোত নাঙেতাঙে সমাজত
থা পরে ঝলপল’ চোঘত বাজদে,
খালিক আমি নই জগদাঙ অহ্’লঙ
পোরেয়ের চোঘোত নাধংছারা অহ্’লঙ
সাত্থর জিতবাদত সাত্থ আহ্’রা অহ্বঙ।
যিদ্দুর আঘে জুরোনত সিদ্দুরোত খুঝি থেই
অহ্দর বাহ্’রা লুব্ভো সমাজত লুভনেয়ে ওহ্য়
নিরেতিত্যে জিংহানি সুঘে কাদেবং।
যুনি মানিলে মর এ কধা
কোচপানা লকফক যুনি দাঙর অহ্য়
সালেন পরান মুই থেম তর, তুই থেবে মর
কোচপানা গিরেহ্ বানোক ওহ্ক অমকঘর।

কোচপানা গিরেহ্ বানোক

০২/১০/১৮

Spread the love
RannyePhul

Explore Chakma Literature, Culture & History

https://rannyephul.com

Leave a Reply

Your email address will not be published. Required fields are marked *