গম লাগানাত্তুন বেচ (চাকমা গল্প)

আদার’ বঝর জিংকানিত, কবিতা, পজঝন, ইয়ানি, ইসকুল-কলেজর পরীক্ষাতেই পরানা বাদে আর যুদা কিছু নয়। মাত্তর সিয়ান এলদে রীতালোই চিনাচিনি হবার আগে। যে বঝর তে আই-এ পাচ গরিনেই ইউনিভারসিটিত্ ফিলসফি ডিপার্টমেন্টত ভর্তি হইয়ে সে বঝর’ একজিবিশনত তার দেঘা হল’ রীতালোই। রীতা সে লক্‌কে মেট্রিক পরীক্ষা দিবাত্যেই যুককুলার। কম-বেচ তিন-চের দিনে একবার তা খুত্তাপুত বরভোই এক্‌কোলোই, বাপ-মাততুন লুগেই লুগেই তে মেলাত যেদ’ । আর সিদুয়োর এক চা-দগানত তার পার্থলোই গমে চিনা-চিনি হল, গম লাগালাগি হল। [ গম লাগানাত্তুন বেচ ]

গম লাগানাত্তুন কক্কে, কেঙেরি কোচপানা হয়, হবল, ঠিক ফুল’ কুরিতুন ফুল হনার ধক গরিই হয়। কোচপানায় মালত পার্থ যে কবিতাউন রীতাত্তেই লেঘি আনিদ, সেই খাতার পাদানি মিলাবোই বুগোত গুজেই ঘরত নিদ। আর পালঙত পয্যা বাদে রেত জাগি পরিদ।

পার্থ হনার্জ্ পাস গরি চাগোরি পেল, রীতাও আই-এ পাচ গরিল। তেঙা পইঝার টানাটানিত্যেই পার্থ আগে মেলা গরিবার চেলেয়ো, ন-হয়। রীতা থাগুইয়া মান্য্যর ঝি, তা বাবে পার্থরে ইউনিবারসিটিত পরিবার সলাত জামেই তুলিবার চেইয়ে; খালিক পার্থ ন-চানাই কামআন সেক্‌কে হোই ন পারে। রীতা তা-বাবর এই কধাআন পার্থরে কইয়ে, ঠিক। মাত্তর ভিদিয়ের ভিদিরে তেইয়ো ন-চায়, যে পার্থ-লোই তার মেলা হোক, যেধকদিন যাবত তার হবদে নেক্কোই আমন ‘থেঙ’ উবরে থিয়েই ন পারে।

চুমুলাং সির গেল, মেলা ফুরেল। মেলাত ধরাধরি গরি তা সমায্যাউন্‌দোই তা মইলা এক্কোই পার্থরে ধুদি পিনেই দিলাক। বেচ ভাগ চাঙমা মেলা ধক তারা মেলাআন’ মদে-রঝে পেলাং পেলাং। বিয়াসুদ ভাঙা শেঝ হল, ম্ব জাগুলুক-অ যুরেল, পার্থলোই রীতা আর যে কন’ নুয়া মেলা গঝ্যা দ্বি-নেক মোগ’ ধক গারিত্তি ধরিলাক। রীতার গীরিত্তির জিংকানিত সাহিত্যর বই-উনোত উই-পূগে ধয্যে পারা হইয়ে। মেলার আগে পার্থলোই এই সেই পজ্‌ঝনর কধা কনা, গম মনে বিগিধি গরি কোল বাজানা আর ন-হয়। রীতালোই সাহিত্যর শেচ আর দাঙর সির কাপ্পান হল’ চিজিককো হনার পর।

পার্থর দ্বি-আন জিনিচ ভারী হোজর। একমক্যাদি তার মোক আর গুরাবোত্যেই কোচপানা, আরো মক্যান্‌দি তার সাহিত্যর রচ চিনানা, রচ তগানা রচ বানানা। গুরাবোরে দুয়ো-নেক মোগে কোচপান, আর সে হিজাবে তারার কিবা পা ধল্য। দি নেক মোগে হোচ গরি তারা দুয়োজনর নাঙর পইলা অক্খরলোই গুরাবোর নাং থই দিলাক পৃথ্বীরাজ ।

পৃথ্বীরাজ খালিক যেধক দাঙর হর সেধক বেচ তা বাবরে লাগত ন-পায়; দিন্‌নোবো অফিঝো আর ঘরত ফিতে ন ফিতে বারে যা পারে সাহিত্যর কামত। রীতালোই, কোচ-পাপি হবার পরত্তুন সাহিত্যআন পার্থর চিদার, ভাবনার, সবনর এক্কান ছিনি-নপায্যা কত্তা হইয়ে। রীতার আগ’ধক সাহিত্যতেই হোচ-ও নেই, অক্তয়ো নেই। পার্থর, মাত্তর সিয়ান, ন-কমিনেই আর বাঝ্যেধে।

তা ভিদিরে সাহিত্যর চিদাআনি ধক দিবাত্যেই, আর জাদর, দেঝর কিঝু গম কাম গরিব’ ভাবিনেই তে এক্কো সাহিত্য সমিতিত্‌ ভর্তি হল’। সমিতিবোর কামর দাঙর বাগ্‌কো তা উবুরে পরিনেই তে ঘর’ কধানি ভাবি বোরেই ন-এধ; কামর নানা জাগুলুক বারিনেই তে মদ খা ধয্যে। ছেরে ছেয়ে মদ্ খেইনেই রেত সংভাগত তে ঘরত ফিরিদ’। এঝান গরি দিন যাদে যাদে তার আর রীতার ছেরে এক্কান বেরাহ্ দেঘা দিল। দি-একবার কোল-অ বাজেইয়োন, মাত্তর কন বাবদে আর মিলা-মিলি হলাক। খালিক, যে লক্কেত্তুন ধরি তারা দ্বিজন’ মধ্যে মেনকা লুঙিল সেই লক্কেত্তুন ধরি তারা কোলআন আর’ দাঙর হওয়া ধয্যে।

পার্থর এক সমায্যার ভোন মেনকা, চিগোনত্তুন ধরি তারার চিনাচিনি। তে পার্থর সমিতিত ভতি হইনেই পার্থ সমারে নানা সাহিত্যর কাম গরা’ ধল্য, কাঝেই তারার নিত্য লাঘত পা-পি হদ’ আর ছেড়ে ছেড়ে বেরাবেরিয়ো হদ’। মেনকা পার্থর বেতন-ন-পেইয়া সেক্রেটারী ধক কাম গত আর পার্থর-অ এঝান অভ্যাচ হল’ দে, তে মেনকারে ছারা কন কাম গরি ন-পারে ।

একসলা পার্থর এক জেঘদে তারে আর মেনকারে বিগিধি গরাগরি গত্তে দেগিনেই বজং আন ভাবা ধয্যে। এ কধাআন কাঝেই বেগ’ যেরে হলেয়ো মেনকার কানত লুঙ্যে, ভালেকদুর বদলেই, খরাবতেই। এ কধাআন শুনিনেই রীতার তা নেক্‌কো উবুরে বিছাচ ভাঙি যা ধল্য ।
একবার তে রাগম্ব মাধাত পৃথতীরাজ সমত তে, তা বাব ঘরত ধেই যেইয়ে। তা মা খালিক পার্থরে আমন পুয়া ধক কোচ পেদ আর মাঝ্যর হাবত যাবত কধানি বিচ্ছাচ ন-গরে। তা কধা ধরিনেই রীতা তার শোরম্ব ঘরত ফিরি গেল। এঝান গরি দি-একবার যেইনেইয়ো তা মা তারে আ ফেরত পাদেল, মাত্তর পার্থ একবার-অ তা মোক্করে ফিরি এভাত্যেই ন দাগিল’। ইয়ানদোই ভঝমান মন’ দুঘ পেলেয়্য রীতা কাররে ন কয় ।

মেনকা মাঝ্য কধা শুনিলেই ইক ইতুক বুঝি পার্ল পার্থ আর রীতার কোল কিত্‌তেই বাচ্যে। একবার পার্থদাঘী ঈদু বেরা যেই তা ভুজীর (রীতার) কধা বাত্তা আর সাদাঙা জাত্যা লোবিয়োত তাত্তুন পেই আঝল কারবারান বুঝদে আর দেরী ন-হয়। মেনকা যেঝান চালাক, সেঝান উজু উজু । তে পার্থরে ভাঙি কল’ দে তাতেই ভিলি যদি গীরিস্তি এক্কান ভাঙি যেবার অক্ত হয়, সালে তারার মাদাদাদি ন-গরানাই গম হব। পার্থ খালিক মেনকারে এঝান দোল গরি বুঝেই দিলদে যে তে যদি তাললোই কাম ন গরে, কধা না-কয়, সালে গায় তারে নয়, গদা সমিতিবোরে আঝার মারানা হব, কাজেই মেনকা পার্থর কথা আর বিছাচ ন-যেই ন-পাল্য। আর তা মোক্‌কোর রিজানাআন তে ‘মিলাই-দ কাজেই রিজেবাক’ কইনেই উরেই দিল। মেনকা কন বার পার্থর কন’ কধা ন-ফেলায়, এবারঅ ন পাল্য। পার্থ আর রীতা আগ’, ধক আর কধা ন-কন, এঝানকি কোল-ও ন-বাঝান। যে কধানি দিজনে কহন, সিয়ানি সিনেমার নুদি গরে পারা। রেদোত্ত পালঙর এক মাধাত্ একজন, আরেক মাধাত একজন, সংমধ্যে গুরাবো। তারার চিজিবো তারা দ্বিজনর কোচপানার সংমধ্যেও এগই গেল; কাদা হোই নয়, ফুল হোইনেই । দ্বিজনর কোচপানা বেক গুরাবো উবুরে ধালিলাক।

এক্‌কো মানুঝ্যে আমন’ মোগ’ উবরে যেতমান ভর দি-পায়, পার্থ যে ভিদিরি ভিদিরে কক্কে তা মনর মুরুঙর জিনিচানি মেনকার বারা’ উবুয়ে তুলি দিয়ে, তেয়ো খবর ন-পায়। কধা কনায়ো তাল্‌লোই, ভাবনায়ো তাল্লোই। তা মোক্‌কো বাদে যেন গীরিত্তিয়ান চালেই ন- পারিব, মেনকা বাদেয়ো জিংকানিয়ান চালেই ন পারিবার অক্ত হইয়ে পার্থর। তা মোক্‌কোরে যে কধানি কবা’র চেলেয়ো কোই ন পারের, সেয়ানি তে মেনকার সজাগ কানত, ন-ফুরেইয়া কবিতা ধক ধালি দিদ; তার দুঘর কধা, তা চিদা-ভাবনা।

পার্থ একসলা মেনকারে গম পায় ভিলি কইয়ে, খালিক লাঙোনিরে কয় পারা গরি ন-কয়, উজু কধায় কইয়েদে। পার্থর জিংকানিত তে কোচপানা আর গম লাগানার ফারক্কান বুঝি ন-পারে। তা চিদা ধগে তে রীতারে কোচ পায়, আর মেনকারে গম পায়, মাত্তর একজন ছারায়ো বাজি ন-পারিবদ্ধ পারা পায়। গম লাগানাত্তুন কদ্দুর বেচ হলে কোচপানা হয়, নাকি দ্বিআন দ্বিজাত্যা ভাবনা, পার্থ সবাই বুঝি ন পারিল’।

রীতা পার্থরে যুদা মিলালোই রিঝেই পারে কোচ পায় কিনেই রিজাইদে। তা কোচপানায়ান পার্থর কোচপানাত্তুন যুদা, যিয়ান মিলার কোচ পানা, যিয়ান পাৰ্থ ন-বুঝে, সিয়ানী কন’ মরদে বুঝি ন-পারিবাক। তারার কোচপানাঘান দ্বি-জাত্যা হোই পারে। মাত্তর এককান বজং জিনিঝোত তারার মিল আঘে হবল যিয়ান্‌দোই তারার পইলা একধক মানুচ ভাবিনেই গম লাগালাগি হইয়ে, তারার রাগ, তারার জিদ্ দুয়োগান দোমেই ন-পায্যা। কেয়ো কেয়োত্তুন হদিবার ন চান ।

শেষ বারততেই পার্থ লোই অমগদ গরি কোল বাজেইনেই রেত্তো পার হদে ন হদে গুরাবোলোই রীতা তা বাব’ ঘরত গেলগোই। রীতা বাপ্পোই পাৰ্থতুন ছুরকাগোচ মাগিনেইয়ো পার্থ ন দিল; আর তা শোর’ ঘরত যেইনেই রীতারে ফিরি এবাত্‌তেইয়ো ন দাগিল। বঝরবো বিদেই যাদে ন-যাদে মেনকা বো গেল; এক্কো ডাকতর’ ঘরত ।

পার্থর মদ খানা বারিল; দুঘোর কবিতা লেঘানাও বারিল। মদ খেইনেই তা সমায্যাউনরে তে রীতাত্তেই কোচপানার কধা হয়। খালিক মদ খেইনেই কনবার তা শোর ঘরত ন যায়। যেক্কে যায় গম মানুষ, তা পুয়াবোরে চেবাতেই। তা চিগোন শালাবোই তারে ভারী কোচ পাই ভিলি তারে কেয়োই কিচ্ছু কোই ন পারন। পার্থ বেরা গেলে তা শোরীবোই চিত্ পুরিনেই তা বেগ’ চিগোন পুয়াবো হাদে একাপ চা পাধেই দে আর দ্বি-মইলা- ভাগিনা পার্থলোই গপ মারন। তা মোক্কোইয়ো গুধিতুন ন-নিগিলে’ পাৰ্থইয়ো খুযি খুযি ন-মাদায় ।

দিজনর কোচপাপি মানেইয়োর কধাবাত্তালোই দেঘেই ন-পারিলাক, চলন ফিরোন্‌দোই দ, বুঝিবার কিচ্ছু নেই। কোচপানার যুর-গেদোর বানা এক্কান বান, তারা দ্বিজনর ধগে, চিদায় কধায় তারা দ্বিজনর হোজর পৃথ্বীরাজ।

[চিরজ্যোতি চাকমা ও অন্যান্য সম্পাদিত সত্ৰং। ১৯৮২]

গল্পকার: রাজা দেবাশীষ রায়

সূত্র: বাংলাদেশের চাকমা ভাষা ও সাহিত্য

Spread the love
RannyePhul

Explore Chakma Literature, Culture & History

https://rannyephul.com

Leave a Reply

Your email address will not be published. Required fields are marked *