চম্পক নগরর উদিজে (চাকমা কবিতা)

– বিক্রম চাঙমা

একদিন তুই মুই আমি বেগে ফিরিবোঙ চম্পক নগরত,
গপ দিবোঙ,গীত গেবঙ ফেলে এচ্ছ্যে সেই জুমঘরত;
ইজোরোত রাধামন-ধনপুদির পালা চলিবো জুনপহ্রত,
লারেয়োর লামায় গারেগায় রন উদিবো আমনর মনত।

চেরোকিত্ত্যে দোয়্যেবি-মেয়্যেবির কোচপানা বান ছিদিবো,
জুমে জুমে মোনে মোনে পাদিবাক শত্তুর মারানা ঈধেবো;
বিজকগিরি-রাধামন-রুনু খা’র বিজক নুও গরি ফুধিবো,
সক্কে চম্পকনগরর খলাত সেই জীদোর বাবদা উদিবো।

থুবো অহ্বাক বেক সোনাত্তালিয় কিজিঙর ধাকগাজিত,
লাগা বান্দরর দল বজি বজি থেবাক তারেঙর জুমানিত;
চিগোন গুরোর রেঙোচাক পরিবাক নন্দরানীর নাজনীত,
খুজির তুবোল ছিদিবো চেরোকিত্ত্যে মুরোল্যে মেদেনীত।

মুরোল্যে সোনা রঙে সাজি থেহ্ভ’ পাগানা ধানসিজেত,
পাগানা সিন্দিরে মিঝি থেহ্ভাক সিম্পুগোর মালেয়্যেত;
খানাদানায়, কোচপানায় বেগে ভরন থেহ্ভ’ আমিজেত,
কন’ রাহ্ত ন’পুরিবো মেদেনীত, থে পারিবঙ নিচিদেত।

জুমঘরর শিঙের র’ শুনিবো মুরোল্যের দনায়,কলগে,
সেই র’লোই ডাগাডাগি গরিবাক লাঙ্যে-লাঙুনিলগে;
জুমো ধানে-তোনপাদে তুজিমপুরে কাদেবঙ বেগে,
তুই মুই ফিরিবঙ চম্পক নগরত, থেবঙ বেগে সুগে।

চম্পক নগরর উদিজে

চাকমা বর্ণান্তর: 𑄌𑄧𑄟𑄴𑄛𑄧𑄇𑄴 𑄚𑄧𑄉𑄧𑄢𑄧𑄢𑄴 𑄅𑄘𑄨𑄎𑄬 (চাকমা কবিদে)

Spread the love
RannyePhul

Explore Chakma Literature, Culture & History

https://rannyephul.com

Leave a Reply

Your email address will not be published. Required fields are marked *