চাঙমা সাহিত্য চজ্জা আা ভাঝর উজোন্দি কন পধে

ভালকদিন আগেত্তুন ধরি চাঙমা সাহিত্য চজ্জা আা ভাঝর উজোন্দি পৈদেনে মাধাত ঘুরপাক খেলেও এধকদিন সং লিঘিম লিঘিম গরিহ্ লেঘানা ন অহ্ই। কয়েকদিন আগে (১২/০৮/২০২২) ফেসবুগোত রোনাল্ড চাঙমা নাঙে একজনে “চাকমা সাহিত্যের অপমৃত্যু বাঁচানো দরকার” আকনাঙে একখান লেঘা ফগদাং গচ্ছি। মুই মনে গরং তা সান, ম সান গরিহ্ আর’ ভালকজনে ভাবন চাঙমা সাহিত্যর এ দঝা নিনেই। খালিক, সে পৈদেনে লিঘিয়ে নেই কলেহ্ স্বোই। সে পৈদেনে রোনাল্ড দাআর লেঘান দেঘিনে মরও লেঘিবার আহ্ওচ্ছান বাচ্ছি সেনে লেঘানা। ভাবনানি লেঘানা দরগার, ফগদাং গরানা দরগার। সে পৈদেনে লেঘানাত্তে রোনাল্ড দাআরে অতালিয়ে পাত্তুরুতুরু জানাঙর।

এবার আঝল কধাত এঝং। আমি খবর পেই- যে জাদর ভাচ, সাহিত্য যেধক অজলত সে জাত সেধক মাধা অজল গরি থাই। খালিক, কয়জনে চোক দেদন এ কিত্থেদি? বানা সাহিত্য রজেলে সাহিত্য অজল ওহ্ই ন পারে, যুদি গম, মানবলা সাহিত্য ন রজেলে।

চাঙমার লেকখি সাহিত্য পত্থম রোজেয়্যেহ্ কবি শিবচরন (চাঙমা)। তেই পত্থম চাঙমা কবি। তার রোজেয়ি কবিদে বইবু নাঙান অহ্’লদে ” গোঝেন লামা”। আদারহ্ শতাব্দীর ভিদিরে সিবে রজেয়ি ভিলি কিয়েচ গরাহ্ অহ্ই। সে জেরে শত বঝর ধরি নাঙঘিনি পারে পারাহ্ কন’ চাঙমা সাহিত্য লেকখি গরিহ্ পাআ ন্ব যাই। কুরি শতাব্দীর পোইল্যে দঝগত ধর্মধন নাঙে একজনে একক্ব মিলে “চান্দবি”রে নিনেই চাঙমা লেঘায় বাংলা কধায় কবিদে রোজেয়্যেহ্। সে জেরে ১৯০৩ সালত ফিরিংচান নাঙ ফুত্যে প্রবোধ চন্দ্র চাঙমা “আলসি কবিতা” নাঙে কবিদে বই ফগদাং গচ্ছি। সে বইবুর একক্ব কবিদে ‘আলসি মিলার কথা” কবিদেবু সে লকখে মানুচ্ছুনরে ভজমান রস আন্বি দ্যে। সে জেরে চাঙমা রাজঘরর মানুচ রাণী বিনীতা রায়র আনঝামে ১৯৩৬ সালত পত্থম খেবত্তে ‘গৈরিকা’ নাঙে একখান কাবোচ/পত্রিকা ফগদাং অহ্ই। গৈরিকার পত্থম নাদাত/সংখ্যাত আগিয়েকাবিল/চিত্রশিল্পী চুনিলাল দেবানে তার পত্থম চাঙমা কবিদে- “ঘর’ দুয়ারত এইনে ডাগের সিবা কন্না মরে” ফগদাং গচ্ছি। সিবে পত্থম চাঙমার আধুনিক কবিদে। তা জেরে ১৯৪৮ সালত শ্রী মুকুন্দ তালুকদারর ‘পুরান কদা’ কবিদেবু গৈরিকাত ফগদাং অহ্ই। সে জেরে কবি সলিল রায়র ‘দুরত ন যেচ সোরি’ কবিদেবু ফগদাং অহ্ই। (সুগত চাকমা, বাংলাদেশের চাকমা ভাষা ও সাহিত্য)

পত্থম তিনন্ব চাঙমা আধুনিক কবিদে পৈদেনে ইয়োত্তুন জানি পারিবা: বিংশ শতাব্দীর প্রথম তিনটি আধুনিক চাকমা কবিতা

চাকমা সাহিত্যর বয়স ইরুক(২০২২) সং ২৫০-৩০০ বঝর দ অহ্’ব। সে ইঝেবে ১১-১৪বু তম্ভা/প্রজন্ম যাদন্দোই। সুনানু সুগত চাঙমার কধা ধগে ১৯৭০সালর জেরেহ্ তেহ্ চাঙমা সাহিত্যর গঙার বাচ্ছিদে। ১৯৭০ সালত ননাধন নাঙ দিনেই সুগত চাঙমার একক্ব কবিদে বই “রাঙামাত্যা” নাঙে ফদগাং ওয়িহ্। ১৯৭০সালর জেরে দীপংকর শ্রীজ্ঞান চাঙমা, ড. ভগদত্ত খীসা, সুহৃদ চাঙমা, কবিতা চাঙমা, মৃত্তিকা চাঙমা, ফেলাযেয়া চাঙমা (প্রমোদ বিকাশ কার্বাবী), বীর চাঙমা, কৃঞ্চ চন্দ্র চাঙমা, পরমানন্দ চাঙমা, রনজিত দেবান, সমিত রায়, চিরজ্যোতি চাঙমা, শান্তিময় চাঙমা, ঝিমিত ঝিমিত চাঙমা দাঘির বহুত ছড়া, কবিদে, গীত, নাটক ফগদাং ওহ্ইয়ুন।

কধ গেলে চের/পাচ দঝক ধরি তারাহ্ চাঙমা সাহিত্যরে আগুলেই রাঘেয়্যন আা যা পাচ্ছুন এদ্দুরত উজে আন্যন। খালিক, এদ্দুর উজে এঝানাত কি বাক ধুজিব? নুও তম্ভায় কি ভাবের? এ পুঝোরানি পুরোনি লিঘিয়েউনর মনতও ঘুরপাক খাই অভল।

এ পুঝোরানির জোপ কি আমি দি পারিবং? আমাত্তুন দ্যা পরিবু। ইরুক দ সিকখিত মানুচ আর’ বেচ বাচ্ছুন। তেহ্ সালেন, সাহিত্য চজ্জা গরিয়ে আর সাহিত্যর মান কিত্থে ন বারের? ভালকজনে আবিলেচ খেই কঅন- এভ সং আমাহ্ সাহিত্যিকউনে সেই কোচপানা, লাঙ্যে-লাঙোনি, তোন তগা এই সেই নিনেই পুরি আঘন। কধান নয়দি নয়, অহ্ই। কয়বু বা কবিদে আঘন রাজনীতি, অর্থনীতি, সমাজনীতি, দর্শন, বিজ্ঞান নিনেই। গনিলে পেভ। আমি এভ সেই পুরোনি ভাবধারা নিনেই পুরি আঘি। আমাত্তুন চিদেআনি অঝার গরাহ্ পরিবু। রাজনীতি, অর্থনীতি, সমাজনীতি, দর্শন, বিজ্ঞান জানা পরিবু। নলেন আমার সাহিত্য বানিমরা অহ্’ব, মরি যেব। ইরুক মানুচ্ছুনর অজল, অঝার চিদেআনি লঘে খাপ মিলেনেই সাহিত্য চজ্জা গরাহ্ পরিবু। বানা, লিঘিলে ন অহ্’ব, লেঘার মান বারাহ্ পরিবু। মানবলা সাহিত্য, সাংসাঙ্যে সাহিত্য জনম দ্যা পরিবু। আর সাহিত্যর ভালক্কুন ধেলাত্তুন ছরা, কবিদে আর গীত সারেপারা লিঘিয়ে থেলেও, জুদো ধেলাত (যেন- গপ, পচ্ছন, উপন্যাস, নাটক) লিঘিয়ে একক্বোরে কম। সেনে সে কিত্থেও মন দেনা গরচ আঘে ভিলি মনে গরং।

এই গেল’ সাহিত্য কধা। ইকখিনে এঝং ভাঝর কধাত। চাঙমা ভাচ আঘে কিনেই চাঙমা সাহিত্য আঘে। আর সাহিত্য ন থেলে ভাচও মরামরা অহ্ই। ভাচ আর সাহিত্য এক্কান্দোই আরেক্কান ঘুঞ্জিমুঞ্জি। দুঘোর কধা অহ্’লদে- যারা চাঙমা সাহিত্য চজ্জা গরি এত্থন, গত্থন তারার চোক বানা এককিত্থে, সাহিত্যর কিত্থে৷ ২৫০-৩০০বঝর জেরেও চাঙমা ভাঝর এ দঝা দ সেনত্তে। কি দঝা ভিলি! এধক বঝরেও নেই একখান দোল বানান সুধোম, কনে কিঙিরিহ্ লেঘের তার নেই কন’ থিক। কুভোত ক, কুভোত হ লিঘিবাক থিক বুঝি ন পারন। ধগে নলেন, একক্ব মাত/শব্দ দ্বি-বাবদর গরিও লেঘন একদাঘি। কধে- এঙিরি কি ভাঝর উজোন্দি অহ্ই?

পরহ্: চাকমা ভাষার বিতর্কিত তিনটি বর্ণের ব্যবহার ও প্রতিবর্ণীকরণের ব্যাখ্যা বিশ্লেষণ

বেগত্তুন বেচ দুঘোর কধা অহ্’লদে- আমার নিজো লেঘা থেনেও পরেয়ে লেঘায় সাহিত্য চজ্জা এভ সং চলের। যে জাগাত নিজো লেঘালোই বানান সুধোম থিক গরিহ্ ন পারিয় সে জাগাত বাংলা/রোমান লেঘালোই কি পারিবং? চাঙমা লেঘার বানান সুধোম থিক গরিহ্ পারিবং যুদি ভাচ বিজিরেয়ি, সাহিত্যিকউনে চাঙমা লেঘা নিনেই কাম গরন আ চজ্জা গরন। রবীন্দ্রনাথ ঠাকুরদাঘি যেন মানবলা, অজল সাহিত্য রজেয়্যন সেন তারাহ্ ভাচ আ বানান নিনেইও কাম গচ্ছুন। তারাহ্ ধক্যেন কাম গরিয়ে ভারি দরগার আমারও।

আরেককান কধা ন কলেহ্ ন অহ্ই সিয়ান অহ্’লদে- ভাচ-সাহিত্য নিনেই তেম্মাং (আলোচনা-সমালোচনা) গরিবার পরিবেচ বানা পরিবু। আলোচনা-সমালোচনা ন থেলে বোলি সাহিত্য ন পেভং। সেনত্তে, আমাত্তুন সমালোচনা সহ্য গরাহ্ পরিবু আর রেঝারেঝি-কেনাকেনি বাদ দে পরিবু। বেক্কুনে যেন গঠনমূলক সমালোচনা আঝা গরিয় সেন আমারও উজিত গঠনমূলক সমালোচনা গরানা। ভাচ আর সাহিত্য নিনেই কাম গরিয়ে জধাউনোর অকথ এচ্ছি ভাচ-সাহিত্যর মান উজোন্দিত্তে মুরোত পুরি কাম গরানা, ভাঝা ভাঝা কামানিরে গভিনত নিনেই ভাবানা। ভাচ, সাহিত্য, সংগীত নিনেই লেঘাপরাহ্ গরিয়েলগে যদি এ কামানিত উজে এঝন সালেন আর’ বেচ ঝাদি আা দোলে কামর বাক উজেব ভিলি মনে গরং।

লিঘিয়ে: সুজন চাঙমা (জুম্মধন)

✍ ১৮/০৮/২০২২খ্রি.

Spread the love
RannyePhul

Explore Chakma Literature, Culture & History

https://rannyephul.com

Leave a Reply

Your email address will not be published. Required fields are marked *