জিববন (চাকমা গল্প)

আদেক্যাগোরি মুই মনানরে বুঝ গোরিলুং, মুই ইক্কে হসপিটালর এক্কান বেডত। সালেন মুই ইক্কে ক্যান্টনমেন্টত নেইয়ার। এ কধানী ভাবদে ভাবদে কেয়্যায়ানর বাঙেত্তুন পিরে গোরি উদিল’। মর ইক্কে তজিমগোরি উজ ফিরিল’, বিদি যেয়্যা কয়েক্কো দিনর ঘটনায়ানী ঘুত্যার ফাইলত খুলি খুলি চা ধোরিলুং। [ জিববন ] এ কয়বো দিন মরে অম’হদ’ তোচ্ছারিং খাবেওন ক্যান্টনমেন্টত। কয় ডিগ্রী তোচ্ছারিং খাবেওন সিয়ানর ইজেব মুই গোরি ন’ পারিম, কেত্তেভিলে মুই ম্যাথমেথিক আ পেজিক্স এব্বে কম বুঝং। সেবাদে ম্যাথমেটিক্স আ পেজিক্স মর সাবজেক্ট নই। মুই আন্দাজ গোরি চেলুং মরে কন হসপিটালত আন্যন, ইওত কি কন’ চাঙমা আঘন, নাহি বেক্কুন বাঙাল! এধক্যা গোরি মুই ব্রেনত একবাবত্যা খারা খেলাঙর চোক্কুন খাদিনে, এধক্যা খারা খেলাদে মত্তুন জম’ গম লাগে। চোক্কুন খাদিনে চিদে গোরিলে মনান ঝাদি থিধো গরা যায়। কেয়্যার পত্তেক সিগনেল দোল বুঝো যায়। মুই কনকিচ্ছু গোরিবার যেলে এধক্যা গোরি ভাবং। এধক্যা গোরি ভাবদে ভাবদে এক্কো মিধে র’ কানপাদাত এই আভর খেল’, লগে লগে মর চিদে গরানার মন ভাঙি দিলো। মুই র’বো ফলো গরি রিনি চেলুং, দোল এক্কো গাবুর মিলে। বচ্ছান তার পজোজ নই ছাব্বিজ অব’। এ বজত এধক ঝাদি ডা.-। কধা থুম ন’ গত্তে পুঝোর লল’ “ইক্কে কেঝান আঘজ? ” মরে মুই চেইনে কোলুং, গম আ বজঙর সংমোধ্যে। মিলেবো ম’ কধায়ান দোলে বুঝি ন’ পারি আর’ পুঝোর ইরিল’, “সিয়ান কেঝান্য!” এবার তারে মুই বোজেয় কোলুং, “গম ও নই বজংও নই।” কধা কোইনেই তে ম’ অবত্থা লিঘি নিল’। তারে দেঘি মনে অহ্-ল’ ম’ উগুরে অসহ্য এক্কান ফিল উয়ে তার। কিচ্ছু ন’ কোই ফাইল্য আধত গোরি ফিরিল’! ম’ ধক্যান কাঙুরুক লাম্বা চুল, মুয়োত দাড়িচাক মানঝোরে অসহ্য ন’ অব’ কারে অব’। সেবাদেও এযানার লগে লগে ফাজালামি! ঘিচ্ছেগোরি কলেহ্ ফাজালামি মুই ভজান গম পাঙ।

মিলেবো যানার যেরেও তার মুয়ো আরুক্কান নিজেনিত দোলেদালে আভর খেল’। মনত সমিল’। কালা লাম্বা চুল, ধুব এপ্রন, আহ্-দত চিগোন এক্কো ঘুরি, দপলা চোঘ, গুল মু, ধুব দাত, থুগুরিয়ানত এক্কো তিলক্কুফুধো, চোঘো ভঙানি চিগোন চিগোন হামাক্কায় পাল্লারত যেই সিক্কে গোচ্ছে! একপল্লা দেঘি তা গোদা আরুক্কান যেবাবত্যা গোরি মনত থেল’ এজনমত অন্য কন’ মিলের আরুক সিক্কে গোরি মনত ন’ থা-ই! সালেন এ মিলেবো কন্না? নাহ্, সেধক্কানি ভাবিলে ন’ চলিবো ম’ মনানে উজ দিল’। সেযেরে মুই আর’ চোক্কুন খাদি ভাবনাত দুবিলুং। এবার মুই দেঘঙর সাতজনর এক্কো টীম মরে আমা ঘরত্তুন তুলি আন্যন্দোই। যারা যিওন সিওন বেক্কুন সিভিল ড্রেজে। তা ভিদিরে পাজজন জাদ ভেই দ্বিজন বেজাদ। যক্কে তারা মরে দাক্কোন সক্কে মুই হিলোর আগর ইক্কে আ মজোঙর রাজনীতি নিনে একলামা ভাবঙর। ভাবি ভাবি এক্কো খাতাত মর বানেয়্যা মাজালোই লিঘি রাঘাঙর, য্যান কেয়োই ন’ বুঝন। তারা মরে ঝাপ্তে ধোরিলাক মনে অহ্-ল’ তারা এক্কো ঝারবো অহ্-রিং পেওন! সালেন কি তারা চোঘোত আমন’সান বন্দাউন অহ্-রিং, না অন্য কিঝু? একবাবত্যা মুই সেধক্যা কিচ্ছুই গোরি ন’ পারিলুং, যেধক্যা মর গোরিবার উজিত এল’।

সিরেবো পিরে গরের কোই পারি চোক্কুন খুলিরুং। আত্থেরবলা কয়েকজন ম’ কায় থেঘে আঘন। এবার আদেক্যাগোরি মনত উদিল’ ম’ হুলোত বারি দিনে মরে ইধু আন্যন, মর বুঝোদে উনো ন’ থেল’। পিচ্ছে আত্থনি তানিনে এক্কান চেয়ারত বানী রাগেওন। হাক্ষন যেরে ধবধব র’ গোরি কন্না য্যান এল’, বেঘে স্যার এক্কো র’ গোরি জুরেয় গেলাক। মুই সিরেবো তুলি তারে চেলুয়। বুঘর বাঙধাঘত লেঘা আঘে “উমর ফারুক।” তে চেয়ারত বুজিনেই মরে তারার বাঙালর আরাং গেল এক্কো দিনে কল’, “বাইনচোদ! নেতা সুদাস? আন্দোলন চুদাস? ” নাহ্, তার কন’ কধাত মর রাগ-অ ন’ উদিল’ দর-অ ন’ লাগিল। মর তক্ষানত মনে অল’ ইবে পাগল কুগুর বাদে কিচ্ছু নই, হামাক্কায় যেরে মরে তে কামেরেব’। মরে চুবগোরি থাদে দেঘি আর’ পুঝোর লল’, “এই তুমি এতারে বেজ খাবে দুও নাহি? তা কধা সুনি সিভিল ড্রেসত্তুন একজনে কল’, “তারে আনদেসলাত হুলোত বারিদি উয়ে।” “আচ্ছা” কোইনে ম’ ইন্দি চোঘ ফিরেল’। মুইও নদরেয়্যা আরুক ফোলেয় তারে রিনি চেলুং। কিজিনে তক্ষানত তার মরে কি মনে অহ্-ল’! চেয়ারত্তুন উধি যাদে যাদে কোই উদিল’, “এতারে ট্রিটমেন্ট গরগোই।” মুই তা কধা সুনি হুলি অহ্-লুং। লগে লগে মরে আরক্কো গুধিত নেযেলাক। গুধিত সমিনে বেক্কান রিনিলুং কনহিত্তেই নার্স আ ডাক্তর নেই। সালেন ইবে কি গুধি! তক্ষানত ইধোত উদিল’, তারা মরে ইক্কে পেজিক্যালী তোচ্ছারিং খাবেবাক। তারারে পুঝোর লোলুং, কি অহ্-ল’ মরে দ’ ট্রিটমেন্ট গোরিবার কধা। “তে ইয়োত কেত্তে? কন্না একজন কোই উদিল’ “বাইনচোদ, এতাই তো তোর ট্রিটমেন্ট।”

আদেক্যাগোরি আর’ সে মিধে গত্তনার র’বো সুনিলুং। তক্ষানত মর ভাবনার সাবজেক্ট তেক ফেরেল’। ইক্কে মুই আগত নই, বত্তমানত, চোঘখ্যাত্যা নই চোঘ মেল্যা, চোঘ নাদি কাররে ন’ চাঙর, চাঙর চোঘ হুলি। সে চোক্কুন, সে মুয়ান, সে আরুক্কান। মিলেবো আগসান পুঝোর লল’, “ কেঝান আঘজ?” তারে কবিধক সাজি কোই উদিলুং-

“গম থেবার চোয়োং ভাবি আগপর;
কুধু মরে দিলাক তারা,
অহ্-রিঙোসান ধরি আনি তোচ্ছেলাক
গোদা কেয়্যা পিরে, গম থানা কি অহ্-য়!”

এধক্ষন মিলেবো ম’ কধানি সুনি থেল’। দাত্তুন নেগেলেই কল’, “তুই কি এধক্যা কধা কনাত্তে এধক্যা উয়োচ্ছে?” তে কি কধ’ চেয়্যে বুচ্ছোং। তা কধা সুনি মনে মনে এক্কা আঝিলুং। কেত্তে আঝিলুং? তে কোই ন’ পারে মুই এক্কো লোরবো। অহ্-লে মনে গরিই পারে মুই মুরাল্যা বন্দার অধিকারত্তে লোচ্যাউন একজন! তা’ কধাত কন’ জোব দিবার গরজ মনে ন’ গরিলুং, জোবঅ ন’ দিলুং। মিলেবো আর’ পুঝোর লল’ সে এক্কুয় কধা। এবার কোই পরিবো বুঝি কোলুং “তর যিক্কে যিয়ান মনে অহ্-য়?” ম’ কধা সুনি মিলেবোই দাত ভেগেদেয় আঝিল’। মনে অহ্-ল’ মর কেয়্যাত কন’ পিরে নেই। মুই সে আগসান, আগর জুনান। তারে পুঝোর লোলুং- তা নাঙান কি। ম’ কধার পুঝোর সুনি কল’- কর্ণফুলী। তা চিনপুচ্চ দিল’। এক্কো আঝি দিনে কধান থুম গোরিল’। তারে দেঘি মনে অহ্-ল’ তে এব’ সুলো বজস্যা খারোচ্যা মিলে স’, কিচ্ছু ন’ বুঝে! মনে মনে ভাবঙর, তারে দ’ এ জাগানত ন’ মানার, তারে মানেব’ কাল্লোঙর জুমত, জুম ঘরর ইজোরত, রাধামনর সমারে। তা নাঙান কর্ণফুলী, এ কর্ণফুলী গাঙানরে চাঙমাউন ‘বরগাঙ’ দাগন। তারে চেই পুঝোর লোলুং, কেত্তেই এ কর্ণফুলী নাঙান থোই দুওন তারে! তে মরে রিরিনে কল’,
– “এ নাঙানর পিঝেদি এক্কান দাঙর বিজগ আঘে।”
-“কাপ্তেগধা আ বরপরং?”
– “অধে, কাপ্তেগধা আ বরপরং।”

এ কধায়ান থুম অলে তারে নিমোন লাগিল’ মর। ‘এ কাপ্তেগধাত্তুন দ’ জাদর বেজ আনুদোর দিনুনর জনম, ইরাইরি, কানাকানি, মরামরি দিনর জনম! এ কাপ্তেগধার পানিত্তলে দ জাদর সুঘ-দুঘ কধক নিজেনি দুবি আঘে।’ এ কধা থুম অনার সমারে কয়েকজন পুলিস এই কায় থেঘেলাক। মরে উদিবার কোই ম’ আহ্-দত হ্যান্ডসকাপস বানী বারেদি নেযা ধরিলাক। সক্কে কর্ণফুলী দরদর চোঘেদি চেই আঘে। মুই ঝারবো অহ্-রিঙোসান, ম’ সান্যান গোরি এ এলেদ আহ্-রা জাদত্তে যারা মাদন, বুলন, সোল দোন; তারা বেগে তারার আহ্-দত অহ্-রিং! কধা থুম ন’ অহ্-ল’ কর্ণফুলীলোই, দোলে ন’ অহ্-ল’ চিনাচিনি। ইধু আমাত্তে কন’ গমদোল সুধোম নেই, নেই আমা নাঙে সংএলেদ (সমধিকার) বানা নাঙান! আগসান দিনুন নেয়ার পধে পধে জাদ ভোনুন লাজ আহ্-রান, মাত্তর মাদিবার মুই নেই, তাদিবার বল নেই। আমি ইক্কে জিববন গোচ্ছে সিগেরসান, মাদিলে বানা খা পরিবো, তোচ্ছারিং খা পরিবো। মাত্তর লোরবোর কি দর আঘে? নেই। লোরবোরে কি দোমেয় রাগে পারে? ন পারে। হালিক কম মানুজই মাদন, যারা আজানী, যারা রম’। বেজভাগ ন’ মাদন, ন’ বুলন, ন’ তাদন। সেত্তে বুদ্ধিবলার বুদ্ধির চেরাক্কো ন’ জলে আগসান, বেগে যা পহর তে সবন দেঘন। তারা দঝত এক্কা বুদ্ধিবলা তারাও তারে-তে চজ্জাচজ্জি গরন, মেজামেজি গরন। অক্তবো ভজান হোরে গেলগোই, আগেধরি জধা অহ্-বার গরজ এল’ চেলাউনর। মাত্তর এ অক্তত কি বুঝিবাক চেলাউন?

তারা (পুলিচ্ছুন) মরে গাড়িত তুলিলাক, কনবাবত্যা কেস দোন ঠিকঠিগানা নেই। তক্ষানত ম’ চোঘোত কর্ণফুলীর দোল আরুক্কান ভাজাদি উদিল’। দোল চোঘ, দোল দাত, দোল কালা চুল, দোল কেয়্যার গাব, দোল মাদোনি। ম’ চোঘোত তেহ্ সগ্গর ইন্দ্রর ঝি। মাত্তর তা নাঙত, তা চেদনত কর্ণফুলী এক্কান নাঙ নই গোদা জাদর ট্র্রাজেডি। তা চোঘোত কর্ণফুলী মানে কাপ্তেগধা আ বরগাঙ-। বানা এক্কান মনদুঘ থেই গেল’ কর্ণফুলীরে ম’ চিনপুচ্চ দি’ ন’ পারং, বুঝেয় ন’ পারং মুই এমএন লারমার ফেলে যেয়্যা সাচ্চা লোরবো, জাদপ্রিত্যা, ভাঝপ্রিতা এক্কো চমু, এক্কো লোরবো। মুই এলেদ আহ্’রা জুম্মউনর এক্কো পুঅ, এক্কান সবনর সমার। খালিক তে মরে বিদ্রোহী কবি ইজেবে চিনিল’। এধক্যা গোরি বেক্কানি মিলেয় গেল’।

গল্পকার: সধরক

Spread the love
RannyePhul

Explore Chakma Literature, Culture & History

https://rannyephul.com

Leave a Reply

Your email address will not be published. Required fields are marked *