জুমোন আমার ঘর, জুমোন আমার পরান

জুম কলে মনান কেজান গরেহ্। পরান কোচলি গরে। ইধোত গরি পারং ধোরি। মুই শুনি এচ্ছোং আমা বুড়োবুড়ী, আজু, পিজু, বেক্কুনে জুম বলা এলাক। সারা জিংকানিআন জুম গরি মনত সুগে কাদেই য়োন। জুম সারা তারা কিচছু নবুঝোন-নদেগন…..। মোনে,মোনে, দাবে, দাবে, অঘুর তারুম আগাব্ ভুঁই তগেই তগেই বজর রাগেনেই ফাং গত্তাক কাবিদাক……। [ জুমোন আমার পরান ]

সেই বুড়োবুড়ী আমলত্তুন ধোরি আমা আজু, পিজু উনে বেড়েই, বেড়েই জুম খেদাক। জুমো কধা কোই নপেলে জুমচাব্ বেড়েই নপেলে জুমবলার পেদ ভাদ, ক্ষয় নযান দিন নহাদে। জুম বলাউনে বেন্নে, পোত্ত্যে, ঘুমোত্তুন উদি ভাদ মজালই জুমোদ যেদাক। গোদা দিন্ন্যে জুমকাম গোরি বেল্ল্যে অলে আদামদ, ঘরদ ফিরিদাক। আলগ ঘরদ চানাদ আঃ ইজোরদ বোজি এগত্তর ওদাক। অক্তে, অক্তে জুমো গব্ দেদে, দেদে পোত্তে আমল পরিদো। মাত্তর তারা জুমবলা নঅদাক জুম নগোরিদাক সেক্ষ্যে তারা ইদু হেনে বাজিদাক? জুম নঅলে তারা উবোয় সারা। সেনত্তেই মুই আমা আজু, পিজু উনরে হিঃ হোইনেই হি দিনেই তারারে হুজি গত্তুং জু-জু জানেদুং মুই হবার নপেদুং। ইক্ষিনে তারা আগন র্স্বগদ আমি আগি নরগদ।

তারা আমার কিয়েই এহ্বা তারা লুও আমার কিয়েই লুও তারা চিদেচজ্জা মর সর্বাঙ কিয়েদ রগে, রগে, শিরেই, শিরেই, ছিদি আগে। সিত্তেই দঃ মুই নাগ, অজল, বার গোরি হোই পারং মুই জুমবলা, মুই জুম্মো। “জুমোন মর ঘর জুমোন মর পরান” মুই ইদু বাজি আগং মুই উদু বাজি থেমএ। জুমবলা, জুম্ম্যে , য়েই কধানি এহ্নে বাদে নএজে। ইয়েনি গাজত্তুন অহ্লা পোচ্ছ্যে পারা নয়।

জুম্ম আমা জাদর আজল নাঙ, ইয়েন নকলে নদাগিলেএ সমদ্ নদিলেএ আমাত্তুন গম নলাগে আমারে নমানায় আমারে আমি ছিন নপেই। জুম বলার জুম্মর পুরোন কধা বিজগ কধা, দুগকধা। আজু নানুর মুমিদে পচ্ছন , শুনিলেএ বুঝি পাল্ল্যে আমার পরানদ ফুদে বুক ধিবে দিয়্যে অয় কানানি এজে চোগে পানি বেই পরে। মন কানে, আবিলেজ এজে বুগ আমুরোই, আজুরে, নানুরে, ভাবারে,মামারে, কাক্ষারে, কাক্ষিরে, জিদুরে, জেদেইরে, পিজেইরে, পিজারা, মামুরে, মামিরে আর ভেভেইরে, বোনোইরে, আর কদক ইত্তো কুদুমম্মো গুনরে ইদোদ উদে চোগোদ বাজে তারার বেক্ষুনোর নাঙ ঘিনি লেএ চিৎ পুরি পুরি ইদোধ উদে।

জুম আমা জিংহানী জুম আমা পত্তম জুম আমা স্ববন। জুম আমা কোচপানা, জুম আমা আওজর সদর ‘মা’। সেনত্তেই দঃ জুম নিনেই জুমচাব। জুমোঘর জুম চাগালা, জুমো তোনপাদ এলাপাদি জুম্মো, জুম্মো মোরিচ, জুম্মো ধান, জুম্মো বিগুন, রান্নে বিগুন, জুম্মো জেদেনা, জুম্মো আলু, জুম্মো রেঙ, জুম্মো দাগাচুমি, জুম্মো মাম্রা, জুম্মো চিন্দিরেএ, জুম্মো চিলুম, জুম্মো বর্গি, জুম্মো ভাদ, জুম্মো তাগল, বাগঅ তাগল, জুমত্তুন জুম্মবী, তান্যেবি, রাধামন, ধনপুদি, রান্যেবি।

ধুদুক, শিঙে, হেংগরঙ, বাজী, উবোগীদ, গেঙখুলি, বানআ, পচ্ছন, পত্তিখারা, পোর খারা, পাক্ষোন খারা, ডুমুলুক খারা, গুদু খাারা,শামুক খারা, কুত্তো খারা, ঘিলেএ খারা, নাদেং খারা, দাঙ খারা, বাজ খরম খারা, পেএক খারা, বিজু দিনোদ, মদ, জগরা, কাঞ্জি, দোইয়ে কুজি, পাজন তোন, সান্ন্যে পিদে, বিনি পিদে, কলাপিধে, মু আলু, পোগোনোদ দিয়ে রেঙ, পিলেএ আলু, সিমেই আলু, উচেছ্য নানাক্ষান খেবার দরব মালেয়ে, মান্ন্য, শিরেনা ভাদ জরা, দেনা, মালক্ষি মারে জুমো তোনপাদ, এলাপাদিলোই চোল তংয়ো ভিদিরেএ কুলোয়ান উত্তে গরি এক্ষো পানি গলচ্ছোই আহ্দ জুর গোরিনেই মাদাদ খবং বানিনেই ভাদদেনা।

চিগোন থাক্ষে আমি জুমোদ যেবং কলে হুজি অধং হিজেহিজে গরি জুগুলেদুং হিত্তেই আজু, নানু, মা, বাহ্, দাঙু, বেভেই লগে জুমোদ গেলে পেদ ভরন হেই পেদুং। নুও জুমোর মাম্রা, চিন্দিরে, বিনি ভাদ, কোন বাদ, কেজবিজি ভাদ, বিনি মোকেক্ষে, জুরো আলু, সিমেই আলু, আঃ সে লগে হেই পেদুং, পুত্তিংগুলো, সোরবেকগুলো, কুসুম গুলে, এরেই গুলো, যোত্তেল বিজি, বরাগুলো, ঘেরে আম, নলআম, পকপকগুলো, বত্তাগুলো, আঃ চামিনী কাত্তোল। আঃ জুমো মরঙদ, তানজাঙ, দুধুগোদ, পেদং, মোন কাঙারা, জেএদ কাঙারা, মঘোই কাঙারা, দাজ্জে কাঙারা, ঈজে, উগোল মাছ, নারেই মাছ, সেলস মাছ, গুদুং মাছ, নারেই মাছ, নাবালাং মাছ, আঃ বাঘেই মাছ।

চিগোন থাক্ষে জুমোদ রেদোদ অলে পাগানা চিন্দিরে বুক্কেলোই কেমোদ শিক গাদেই শিম্পুক পাত্তং। বেন্ন্যে পোত্তে আন্দরে বান্দারে যেনেই দেগিদোং চরা, চরা, শিম্পুক পরি আঘন। একতাল অলে ফোরানি ফেলেই হ্লা গরি হেদং। আঃ কোরোই গাজদ কেজ হুমুরি তোগেদং। দিবুজ্জ্যে অলে হুরোল্লেই পেক্ষো টকটক গরি হুনে। বেন্নে অলে হক্কেংয়ো হক্কেং-হক্কেং গরি ডগরেএ, সত্তা পেগে, সনাতালি, চরান। রেদোদ অলে ধুদু হাঙয়ো ধুদু- ধুদু গরি দগরন, উরিং, চঙরায়, ডগরন।

মুই জুমবলা জুম্মো হলে মুই হুজি মআহ্লে মুই থাং। মুই উজু উজু লাগাটানা মুই বেঙাহঙা নবুজোং। মাত্তর মরে যোলেলে মুই কাররে নসারং। কাররে কিয়্যে নগরং। মঃ কাম মুই গরং, যে মাদিদ আহ্ঝার হাঙ সে মাদিদ ভর দি উধোং। জুম্মো বিজগর গান গেই আজং, কানং, জুম্মো গান দোই নাজং। জুম্মো লামা, উবোগীদ, গেংকুলি শুনোং।

সিত্ত্যেই দঃ মুই জুমবলা জুম্মো। মুই জুমবলা জুম্মো য়ইনেই জুনি জুম ফেলেই দেই পাঙ সালেন মুই হিত্তেই জুম্মো অলুং??? জুমবলা জুম্মো য়েইনেই জুনি জুমো জাগাদ পরঅ সিদু আহ্দ পাদং গাবুর গরং ঘরপাদা আহ্রান জুম্মো হলেবার, লাজান পর কধা শুনি পাং সালেন কিত্তেই আমা আজু, পিজু, উনে আমারে ইদু ফেলেই যেইয়োন? হিত্তেই আমারে? জনম দুওন, পালেওন, দাঙর, গোচ্চোন? আমি তারারে নলাজেবং? তারার নাঙান নরাগেবং?

আঃ যারা জুম ছারি মরন দরে বাজিবার আঝায় বাহ্রে পরঙ যাদন তারা হি? সিদু মনদ সুগে আগন? তারা হিঃ জাদরে বোই নিঃ পারিবাক? তারার জাদ ভেই, বোন দঃ বেগ ইদু। জুম্মজাদ অহ্লে তারার হামাক্কাই চিৎ পুরিবো, ইদোত উদিবো, মন কানিবো। “জুম আমার পরান জুম আমার জিংকানি” জুমোন আমার বাপ, মা। ইয়েন আমা আজুপিজু উনোর দিঃ যেইয়ে উমরর ঘর পাদা।

জুম গরি আমি ইদু পরান বাজের। জুম গরি আমি ইদু জিংকানী কাদেই পেবং। সেনত্তেই এই জাগানি আমি ফেলেই নযেবং কাররে নদিবোং, দি ঃ নপারিবোং। দাত কামেরেই মরিবোং তুও নছারিবোং, ইরি নদিবোং। আমি এই জুমো জাগা আমা আজল ঘর পাদা। আজুপিজু দাঘি এই জুমোদ জিংকানি কাদেইয়োন, কাদেই গেলাক, আমারে কোই য়োন আমারে চোগি তেবাত্তেই, ফেলেই যেইয়োন, চোগি তেবার কোইয়োন।সেনত্তেই জুম্মো ‘গাবুরী’ মনর সুগে দোল এক্কো গান গেইয়ে,

“হোই, হোই গোরি জুমোদ যেবং”
“গোচেছ্য সুদো বেজিনেই টেঙা কামেবং”

✍ সমীরণ চাঙমা

তথ্যসূত্র: সবুজ অরণ্য, ১ম বর্ষ, ২য় সংখ্যা, নভেম্বর ২০১৯

Spread the love
RannyePhul

Explore Chakma Literature, Culture & History

https://rannyephul.com

Leave a Reply

Your email address will not be published. Required fields are marked *