তুত্তুরু আ রানজুনি (চাকমা গল্প)

বেলান দুবোঙ দুবোঙ রানজুনি জুম কামত্থুন ফিরিল’  মাত্তর তুত্তুরু এব’ ন’ এযে, তেহ্ কাম গরের মনদি। এঝ’ বঝর অবদে তারার জরাবানা, চুগলাঙ গরানা, থুম উয়্যেদে। মাত্তর এঝ’ কন’ পোও ঝি ন’ লন। বাজিবের ধারোজে তারা দি নেক মোগে এক্কান জুম কাপ্পোন, আরা কারাহ্, ধান কুজা, ওলোত লাগা, মুক্কে বিজি কুজা, মামরা, সিন্দ্রে, ঘুচ্ছে, জেদেনা, কোন, সুগুরিগুলো বিজি কুজিবের সলাবোত তারা জুমোত বাঁ উত্তোন্দি। আ য়ানি কুজি ফোরেয় আর’ আদামত ফিরি যেয়োন। পুঝিম মুখ্যে জুম, বেল আহ্লেলে রোদ পরে মাত্তর দুবোনি দোলেদালে চেই পারে।

রানজুনি ভাত রানা ধরল। এচ্যা ত্যে কোয়েংআলু তোন, ধিঙিশাক, গুরিমাঝ’ সুমো কেবাং গোরিব’, যক্কো তোনানি তুত্তুরুর আয়োজর তোন আ তার। তারার জুম সুলা ধুমধাম। ধানগঝাগুন য়েল য়েল ওই এত্থন। রানজুনি যক্কে ধানার হিত্তে রেনি চাই সেক্কে তা মনান খুজিয়ে ভরি উধে আ মনে মনে খুজিয়ে আহ্ঝে। পাকঘরত ভাত পাতদি ইজোরত হুচ বাভে জুমান রিনি চাই। বেল দুবোনি চাধে তার ভজান গম লাগে। যক্কে পেক্কোন উরি উরি ঘরত ফিরন, সেক্কে রানজুনিত্তুন ভজান গম লাগে। তারও সেক্কে পেঘ’সান দোও মিলি উরিবের মনঝোক অয় । যক্কে ধান গঝাগুন মাত্তল বোয়েরর সমারে লরন, নাজন সেক্কে রানজুনি চেই চেই আহ্ঝে। আ ভাবে কোচপানা ন’ থেলে কন’কিচ্ছু গোরি ন’ পারে, শিঘি ন’ পারে।

তুত্তুরু জুম কামত্থুন ফিরিল’। সেক্কে দুবোং দুবোং বেলান বানা এক্কানাগোরি দেঘা যায়দি। রানজুনি তারে লুঙ্গিয়ান সাগোনান আ জগকো বাভেইদি তেয়ো কুম আ লেম্ব আধতগোরি ইজোরর সাঙু বেই লামি এল’  তারা পত্তোকদিন ঈঙোরি সমারে গাধা যান। জুম’ লেজাত্তলে তারা উক্কো কুয়ো কুচ্ছোন, পানিগান ভজান দোল খাদেও সুওত। তুত্তুরু অক্তে অক্তে আঝিবের কধা কয়, সিয়ানি শুনি রানজুনি আঝ’দে আঝদে গুলি গুলি পরে । তারা দিজনে আইপাইগোরি লো লি উয়োন।

রানজুনি ভাত বাচ্ছে, পোইওত কোয়েংআলু তোন, ঢিঙিশাক, গুরি মাঝ’ সুমো কেবাং বারিহ্ দিয়ে। তোনানি দেঘি তুত্তুরুর খুজিয়ে আঝি খলত খলক। আ তুত্তুরু কয় পরান এচ্যা দ’ ত’ তোনানি মরে পাগল বানেল’ আগে বানেওচ তুই। কধাগান শুনি রানজুনি আল্যেঙর ধাজে কয়, উয়্যে এধক পাগল ওই ন’ পোরিবো, তুই পাগল অলে মুই কেনে বাজিম? তারার নেগ’ মোগো মিলনি য্যান গেল’ জনমর পুন্যর ফল।

ভাত খেই ফোরেলাক। দেবাবোর ধক্কান এধক বজঙ নই, দেবাবোত তারা উত্থোন। তারাগুন ঝিমিত ঝিমিত জুলি জুলি আঝ’দন আ মুরো লেজাত্তুনও রেদোর বাত্তি জুনিগুন জুরি জুলি উরদন। তারা দিজনে ইজোরত এচ্যন, তুত্তুরু রানজুনির করত পুরি আঘে। চিরোহিত্তের পেঘ’ র’ নেই, নেই চেরেপুঘোর দাগ’নি । রানজুনিও তুত্তুরু শিরেবো পোচ্ছে দের, আ কয়-

আমা ধানানি ভজান মধঙমাধাঙ উয়্যে। মত্তুন ধান দুবোগুন দেঘি ভজান গম লাগে, তর কি ন’ লাগে?

লাগে দ’ ভালত্তমান লাগে।

তুত্তুরু দুর আগাজর তারাগুন চেই চেই ভাবে তার ফেলে ইচ্ছে গাবুর কাল কধা। যক্কে রানজুনিলোই  দেঘাদেঘি উয়োন সে দিনোর কধানি। রানজুনি মনে মনে নিজোরে নিজে মনে মনে বায়েনি গরে এসান্যে নেগরে জীংহানির সমার পেনে। আ ভাবে নিজোরে নিজে পিত্থিমিত বেগত্তুন বেচ সুঘি মিলে,কেত্তেভিলি তুত্তুরু মদ ন’ খাই, কাঞ্জি ন’ খাই, ন’ খাই দাবা কারল্লোই কন’ পেজাল ন’ গরে। তারার য্যান কোচপানা ফুরেদ’ ন’ চাই। মন গুমোরত্তুন কোচপানা অনঝুর ফুরি ফুরি উদে, যিঙোরি মাদি ফারি কুয়োপানি নিগিলে।

তুত্তুরু আ রানজুনি দিয়ান আদামত্তুন। বিঝু লক্কে নাকশাফুল তগা যেনে দিজনর লাঘত পা-পি। তুত্তুরু তারে নাকশাফুল পারি দিনে চুলোত গুজে দি আ বিঝুত বেরা যেবার  বোলান্নে দিয়ে। রানজুনিও তারে বিঝুত বেরা যেবার বোলান্নে দিয়ে। যক্কে তারার দিজন দিজনর চোঘে চোঘ কধা কুওকি গোচ্ছোন সেক্কে য্যান পিত্থিমির বেক্কানি ঝুপ ওই চুপগোরি থেয়্যে। আদেক্যা এক পেঘো গীদে তারার চোঘে চোক চা-চি ইরন আ উচ ফিরি পান।

দেবাবো ঝিমিলার, জুরো আভা বার মাত্তর তারার বলপুচ্ছে কিয়েগানি ইজোরত্থুন উদিবের ন’ চার। ঝর ফুধো উক্কো দিবে কিয়েত পত্তন। মাত্তর সেক্কে জুনিগুন মন খুজিয়ে উরদন, দেবাবোর ঝিমিলানি বারের। বেঝত্তুন বেচ অহ্ধে প্রকৃতির দোল আন্ধার আরুক্কান, জুনি উরোনি চানা পেলে ঘর ভিধিরে তারা সুমিই পেলাক। বিচ্ছোন বিচ্ছে ঘুমোত পল্লাক, হাক্কন পরেন্দি তারারে ঘুমদেবীয়ে চোঘ মারে দিল’। গোদাদিনর বলপুজ্জে ধাবেবাত্তে ঘুমোত দুবিলাক তুত্তুরু আ রানজুনি, এযেত্থে নুও দিনর কামর কধা ভাবি আ রাদা দাগ’ সমারে ধারোজে ঘুমত্তুন উদিবের তিরোজে…..

তুত্তুরু আ রানজুনি

গল্পকার: বিকেন চেগে

✍ ৩০.০৯.২০১৫ খ্রি:

আঝিন, ২৭০৭ মহাসাক্যব্দ

Spread the love
RannyePhul

Explore Chakma Literature, Culture & History

https://rannyephul.com

Leave a Reply

Your email address will not be published. Required fields are marked *