ত আঝায় (চাকমা গল্প)

সারা দিন্নবো দেবাবো বেল’ মু’ ন’ দেঘায়। এক্কা এক্কা ঢেবা কালা আ মুরত গোরি গুঝুরে। মেক্কানি হাক্কে দগিনেদি নেযায়, হাক্কে উত্তরেদি নেযায়। বুয়ের বায়। আম, কাত্তোল গাঝ’ পাদানি বোয়েরে লরে। বেল্যে বেল কুদ্ধুর যেইনে দেবাবো ছক ছক কালা গোরিল’। আর’ বেজ বেল’ মু দেঘা ন’ গেল’। কক্কে বেল দুবিব’ সিয়েন’ কোই পারা ন’ যার। বেল তিন পহ্’রত পল’ না কি, আন্দাজ গোরি পারা ন’ অর’। এধক্যে অলে অক্তে অক্তে আদাম’ রাদা কুর’উনে দাঘ কাররন। এচ্যে এব্রে কুর’ দাঘ শুন’ ন’ যার। কি অল’। [ ত আঝায় ]

ইত্তুক চানে এক্কা পজিমেদি মু’ ফিরি রিনি চেল’ কন’ বেলান দেঘে কিনা। কালা দেবাকালা। কুধু বেল দেঘা যেব’? ইত্তুক চান’ আহ্ধত ঘুরি নেই। এক সাপ্তা আগেদি গাধা যেইনে, ঘুরিবোত পানি সমি সুম যেইয়্যে। ঘুরি থেদ’ ইয়ে, কয় টা বাজিল’ কোই পাত্ত। কয় টা বাজের সিয়েনও চেবার ভ’ নেই। ইত্তুক চান’ মা ভাদ রানিবাত্যে আমত্থলত্তুন বাশ দারবো, গাঝ দারবো এক আজা ক’রত গোরি আনি ওলোন সাল’ ধাঘত থল’। আন্যে দারবোনি লেধা লেধা ভিজে। আগুন জ্বালেলে ধুমেব’। ইত্তুক চান’ বাবে উক্কু লেঝু গাঝ’ তেঙেরা ভেরি দের। আমত্থলে উক্ক কুরো চ’ এক্কুজান চিক চিক দগরের। দিবুচ্যে ঝর দিদে সলাত কুরো চ’বো ভিচ্যে। ইত্তুক চানদাঘি ঘরান বাবুছরা মেয়োনী পারত। মেয়োনী পারত কলেও ভালদ্দুর। বেজ গোরি ঝর দিলে, মেয়োনী পার পে’লে পে’লে অহ্লে ঝর’ পানিয়্যে, সালেন ইত্তুক চান দাগী ঘর’ থবাগত পানি ধরেগি। মেয়োনী ওকুলেদি উত্তর নুনছরি, দগিন ননুছরি। সিন্দি রিনি চেলে দেঘা যেদ’ ভালক্কানি ঘর। রেদ অহ্লে চেরাক’ পহ্র দেঘা যেদ’। ধল পহ্র অভার আগেদি রাদা কুরো ডাঘ সুন’ যেদ’। রাদা কুরো দাঘ কারানায় সে আদামান ভরন্দি লা’গিদ’। হালিক পানি উধি ন’ পাত্ত সে আদামত’।
ইত্তুক চান’ মা আগুন জ্বাল’দে জ্বাল’দে তা ঝি’বোত্তুন পুঝোর গল্ল, চিরিঙি, কুর’ স’বো এক মাধান অহ্’ল’ দগরেত্যে। আ কি ওইয়ে?
চিরিঙি কল’, ঝর দিনেই ভিচ্যে আয়।
আ এক্কা চানা।
চাঙর মা।
ত’ বাবে কি গরের?
ইয়্যা, লেঝু গাচ্ছ্য টেঙেরা বেরি দেত্যে।
ইত্তুক চান’ মা এক্কা মু বাবেই ইত্তুক চান’ বাব’রে কল’, তর অহ্লে, নেই দুঘরে, দুঘ গরানা।
ইত্তুক চান’ বাবে তেঙেরা বেরধে বেরধে পুঝোর গল্য, আইয়ে?
ক’ খালী (কবাখালী) মা দাঘীদু যেইনে শুনিলুংদেই, সান্তিবাইনীউনে ভিলে সরনার্থী নিবেক। মেরুঙ’ সিন্দি ভিলে এগজা বাঙাল সম’দন।
ইত্তুক চান’ বাবে তা মোক্ক কধা শুনি এক্কা ধেন্দা অহ্’ল’। তাগলান আহ্ধত গোরি হাক্কন থিয়ে থেই কি এক্কানা চেরো কিত্যেন্দি রিনি চেল’। কি ভাবিল’ ইত্তুক চান’ মা বুঝি ন’ পাল্য। ইত্তুক চান’ বাবেও ক’ খালী যেইনে তেয়্য দেক্ক্যেওই বাঙালউনে বাজেই বানানা। চাঙমাউন ঘর’ কায় কায় বাঙালউনর দ্বি চাল্যে বাজেই। ইত্তুক চান’ বাবে তা মোগো কধা বেজ আমল ন’ দি’ লেঝু গাচ্ছ্য তেঙেরা ভেরি দিল’ কিচ্ছু ন’ কোইনে। ইত্তুক চান’ মাও কনকিচ্ছু ন’ কল’। চিরিঙি কুর’ চ’ বো ভরেল’।
দগিন নুনছরি আদামত বেগত্তুন বেজ দোল গাভুর মিলে রূপশী। পিনোন, খাদি পিনিলে অম’কদ’ দোল লাগে। বেন্যে পত্যে অহ্লে মেয়োনী পারত হুম করত গোরি এধ’ পানি হঝা। কুমবো যক্কে করত লভ’ সক্কে আর’ বেজ দোল লাগে রূপশীরে। কন’ গাভুর মিলে এধক্যে গোরি বেন্যে পত্যে পানি হঝা ন’ এযন। রূপসীরে যে দেঘে তে মনে গোরিবেক, রূপসী গাভুর মিলে নয়, গিরিত্তি ঘর’ বো। অক্তে অক্তে গুচ্ছ গ্রাম ক্যাম্পত্তুন আর্মিউনে এনেই নুনছরি, কিয়ঙ ঘাধ, জারুলছরি, তলেদি বর আদাম, কৃপাপুর সুমুত্ত ভালক্কানি আদাম অপারেশন গত্তাক। গরু, ছাগল, আহ্’স, কুর’ তারা পচ্চ্য ধক গোরি নিদেক। তারাত্তুন মনে কলে তেঙা দিদেক। আ মনে ন’ কলে তেঙা দেনা দ’ উই কধা, দ্বি-এক থাবারা দিদেক। আর্মি এলে আদাম’ গাভুচ্যে উক্কুও থেই ন’ পারিদেক। আর্মি এত্তন কলে’ পুনত মুরি বাজে সং ধাবা দি’ পেদাক। গাভুর মিলেউনে আর্মি দেলে ঘর’ ভিদিরেত্তুন ন’ নিঘিলিদাক। দোল গাভুর মিলে দেঘিলে আর্মিউনে ন’ কয়দে কধা কধাক। সেনত্যেই সান্তিবাইনীউনে বাজারত মিলে ন’ যেবাত্যে মানা গোরি দুওন। রূপসী আর্মি কলে দরে উগুরি উদিদ’। আর্মি এত্যে দেঘিলে কধ’ ‘হজ হুগুরুউন আ এত্তন’।
এক পল্লা ভিরেচ্ছু রেদোত কানের। ভিরেজ কানিলে গম নয়। কুমঙ্গল অয়। আ আদাম কত্তা দি অহ্’রিঙ গেলে, দিনোত সিয়েল ডগরল্যে, রেদোত ফেব’ দগরল্যে, তদেক ঝাক ভাঙ্গালা পরল্যে, সিয়েনিও গম নয়। আদাম ভাঙা পরে। ইত্তুক চানে রেদোত বারে উথ্যে। তেহ্ ভিরেচ্ছু কানেত্যে সুন্যে। ভিরেচ্ছুর কানানা শুনি আমক অহ্ল। ইত্তুক চান’ মাও এক পল্লা সুন্যে এধক্যে গোরি ভিরেজ’ কানানা। সেদিন্যে ইত্তুক চান’ মা কোইয়েদে, আদামত’ থেই ন’ পারিবং আর। রেদোত ভিরেজে কানাদন। ইত্তুক চানর’ তা মা কধা মনত উধি ভাবিল’ অহ্’য় পারাপাং হামাক্কায় ধেই পেবং। এনেও এগজা বাঙাল এয’দন।
ইত্তুক চানে তা পরানত্তুন বেজ কোচপেদ’ রূপসীরে। যিদু যেদ’ সাত, ইত্তুক চান’ মুওত থেদ’ রূপশীর কধা। তা চোঘোদ ভাঝিত রূপসীর মুও আরুক্কান। মনত থেদ’ রূপসীর কধা। ভারি গোরি কোচপেলেও ইত্তুক চানে ভিরেজ’ র’ সুনি ভাবে, সরণার্থী যেই পেলে রূপসীলোই জদন ন’ অভ’। মনে মনে বাঙালউনরে গেল দিল’ ইত্তুক চানে। কয়েকদিন আগে বর আদামত একজনর মেলা ভাঙি যিইয়ে আর্মি এযানাই। মুবিন ক্যাপ্টেন্যে এনেই নুও জামে সুমুত্ত দচ-বার’জন গাভুচ্যে ধরি নেযেয়্যে। রেদোত ভিরেজ’ র’ সুনি ইত্তুক চানে বেন্যে মন মরা গোরি ঘুমত্তুন উধিল’। ওলোন সালত্তুন উক্ক কালা আঙারা আনি দাত দ’লিল’। লদালোই কুমত্তুন পানি আনি ইজর’ মাধাত বঝি মু ধল’। হলাগচ্যে ভাদ এলাক। হলা ভাদ ন’ খেল’। যিন্দি পায় বাঙাল সম’দন, আর্মি ক্যাম্প অর সুনিলে পেদ’ পিলই কাবে। ভাদ খেবার মনে ন’ কয়। ইত্তুক চান’রও ভাদ ন’ রুজে। কেনে ফেলেই যেব’ চিগোনত্তুন ধরি দাঙর-দিগল ওইয়ে মেয়োনী গাঙন। মেয়োনী গাঙ’ পারত ধুব গোরি কেচ্যে ফুল ফুদন, মঘোই কাঙারা চারা কারি ভিজে মাদি ফেলেই থন। গাদত্তুন নিঘিলি বেরান। লধা মাচ্চুনে বুকগোরি থান পানি মুরোত। চোঘ ফাদা মাচ্চুনে ছিরিত-ছারাত বেরান ফেঝা-হঝা সেরে সেরে। নাবালাঙ মাচ্ছুনে ঝাক বধি থান পানি মোর পেলে। সালাঙ মাচ্ছুনে গঙার পানি আ ছির ছিস্যে পানি নালত উঝুনি-নামনি এযন-যান। ফাগুন মাস এলে কঘিলো রই গোদা আদামান ভরন্দি অয়। গাছ তারুমত’ বেলা লাঘা, জুরবো পেক্, ছের পেক্, চত্তা পেক্, অঘ’লক, ডগরন। মনা, চনা, ভরনি দ’ আঘন ঝাক ঝাক। এধক্যে দোল জাগা, কেনে ফেলে যেব’ ইত্তুক চানে ভাবি উধো ন’ পার।
বাবু ছরা আদামত্তুন যক্কে বরপরং যাদন, সক্কে হট্টালী বাব’রে তা বর ভেইবো বরপরং যেবাত্যে ভারি গোরি কোইয়ে। হট্টালী বাবে বরপরং ন’ যায়। হট্টালী বাবে বর পরং ন’ যার কিনেত্যেই তা ভেইবো কোইয়ে, ইদু থেলে বাঙালে কাবিবাক্কেইয়্যে। ঘর পাধা জাগা কারি লবাক। ন’ থেদে ন’ থেদে, যেদঙ। কট্টালী বাবে তা ভেইবোরে ঠাট্টা গোরি মু চিমে আহ্ঝিল’। মনে মনে কল’, তরে পেইয়ে পাগলে। ইদু উক্কু বাঙাল নেই গোরি কেনে বাঙালে কাবিদাক। হট্টালী বাবে পুরি ফেইল্যেগোই এক রেদে কুগিউনে বেইশ মোগোজো চাঙমা কাপ্প্যন। বেইস মোগোজো কাপ্প্যন কিনেত্যে, লোগাঙ, পুজ গাঙ নাঙ ওইয়ে। কুগিউনে চাঙমা কাবানায় ছরা পানিত লোপরি ছরা পানিআন লো ধক্যে ওইয়ে। কাপ্প্যনে মানুচ্চুন’ ঘা’আনি গম ন’ ওইনে পাগি পাগি থাই, পুঝ পরে, সেনত্যে পুজ গাঙ নাঙ বচ্চ্যে। লো গাঙ, পুঝ গাঙ নিনেই আর’ এক্কান কধা আঘে। সিয়েন অল’দে, হিল চাদিগাঙ ইন্দি পুগেদি কন’ ছরা যেদ’ ন চায়। বরগাঙান বলে বলে যেই পেইয়্যে। বলে বলে যেই পার কিনেত্যে লো গাঙ, পুঝ গাঙান’রে গেল দিইয়েদে, তুই লো ধক্যে ওচ, তুই পুঝ’ ধক্যে ওচ। এহ্ সেনত্যে ভিলে লো গাঙ, পুঝ গাঙ ওইয়ে। আ সে আদাম’ মানুচ্চুনে কন, নাগ’ ঘি আঘে কিনেত্যে নাগ’ ঘি নিঘিলি এক্কুজান পানিআন রাঙা ওই থাই, সেনত্যে মান্য লো গাঙ কন। পুঝ গাঙান পেক্খু ছরা, সদিন বারিঝে কুলুক থাই। পেক্খু ছরা, তে পুঝ গাঙ কন।
হট্টালী বাবে তা ভেইবোরে কল’, তুমি যহ্, আমি ন’ যেবং। বুরো-বুরিউনে কোই যিওন, পুগে যেবাক, উত্তুরে যেবাক, দগিনে যেবাক। ইদু যিউন থেবাক, সিউনে সনাত্থালত ভাদ খেবাক। আমি সনাত্থালত ভাদ খেবং। এনেও তমাত্তুন ফিরি এযা পরিবোগোই। উত্তুরে, পুগে যেবাক্ক্যে সিউন ভিলে ফিরি এ্যাই পেবাক। দগিনে যেবাক্ক্যে সিউনে ফিরি ন’ এবাক। তুমি যেইনে কি অভ’। যেই ইদু ফিরি এই পেবাগোই।
হট্টালী বাব’ ভেইবো কোইয়ে, এ জাগানি এধক্যে গোরি ন’ থেব’। আজু বাঝি থাগদে কধে ন’ সুনোস, অনা পধরে পধ অভ’, অ’ঘাধ ঘাধ অভ, অ’মানুচ, মানুচ অভাক। ভেঙা পধ উজু অভ’, লাম্বা পধ, বাদি অভ’। তিন দিনো পধ এক দিনে বেরেবাক। একদিন এব’ চাঙমায় বাঙালে ধাগা ধাক্যে গোরি থেবাক। চাঙমা ঘরত বঝি বাঙালে মদ খেবাক। ভ’ অহ্লে মদ খেই খায় মিলেউনরে টানি যেবাক। এক্কানা বেজ-কম অহ্লে মারি যেবাক। ঘরত আগুন বাজেই দি যেবাক। মারে ফেলেই যেবাক। সেক্কে পত্যেবে, দাদা এধক দাক্কে কিত্যেই বরপরঙ ন’ গেলুং। ইত্তুক চানে আদাম’ মানুচউনে ইয়েনি কুওবোলো গত্তে সুনে। উন্দি খাগারাছরি, রামগর এগত্তর গোরিবাত্যে দপদপ্যে পধ কাবের সরকাচ্যে। গারি এব’ ভিলে। মনে মনে ভাবে, বুর’ বুরিউনে কন্দে কধানি ফেলা ন’ যার।
বেল কুদ্দুর উধিল’। তারা ঘর’ উধোনত উক্ক নাক্শ গাঝ আঘে। ইত্তুক চানে নাকস্ গাছ্যত তলে বঝি আঘে। নাকস্ গাঝ’ পাদা সেরে সেরে রোদো ছদক পঝ্যে মাদিত। দ্বি-এক্কান পাগানা পাদা ঝরি পঝ্যে। বিঝু এবার আগেদি নাকস্ ফুল ফুদন। ফুল ফুদিলে তুম্বাসে ভরি থাই ইত্তুক চান’ দাগী ঘরান। ইত্তুক চানে বঝি থাগদে থাগদে রূপসীরে দে’ল। মেয়োনীআন পার অর’লি। পিনোন, খাদি পিন্যে। বারাত ঝলা উক্কু। আহ্ধত ফুল’ বিঝোন এক্কান। পিঝেদি চুল সুদো। রূপসী মেয়োনী একুলে গালা গালা এযে। গাভুর মিলে বেজ বেরানা গম নয়। মান্যে যিয়েন পায় কন। রূপসী বন্নাঙ দরাই। সেনত্যে যিন্দি পায় ন’ যায়।
ইত্তুক চান দাগী ঘর’ আবাচ্যে পধ এক্কান যিইয়ে। মানুচ বেজ উঝনি, লামনি ন’ গরন। তলেদি এক্কান পধ আঘে। সে পত্থানদি বেজ গোরি যান, এযন। রূপসী অক্তে অক্তে এযে। এলেই ইত্তুক চান দাগী ঘরত ন উধেগোই। ইত্তুক চান’ বাব’রে লাজায়। বানা উজোনিলামনি গত্যে চোঘো লেঝেদি চায়। রূপসী মেয়োনীগান পার অধে, এক্কানা পিনোনান কোঝেল’। একুলে এইনে থেঙত্তুন পেক্কানি ধোই এত্যে দেঘি ইত্তুক চানে বোইদ্যেত্তুন উধি থিয়েল’ নাকসা গাঝর থলে। রূপসী কায় এইনে পুঝোর গল্ল, কুধু যেবে রূপসী?
কাক্কাদাঘীদু।
কধাগান কোইনে আহ্ঝিল’ রূপসী।
কমলে এবেগোই?
আজু ভিলে অসুঘ ওইয়ে। কয়দিন লাগে কিজেনি। যেই না, মরে এক্কানা কুদ্ধুর বারে ধেইগোই।
ইত্তুক চান্দোই রূপসী আহ্ধ’দন। যাদে যাদে রূপসী পুঝোর গল্ল, আইয়্যে সুদ’ মু পাঙত্যে তরে এচ্যে।
রেদোত এক্কান ওইয়্যে।
রূপসী আহ্ধদে আহ্ধদে মহ্’ অহ্’ল’। আমহ্’ক ওহ্’ই পুঝোর গল্ল, কি ওইয়েদে?
ধেই পেবং নাকি কিজেনি।
তর কি অলদে?
সান্তিবাইনীউনে ভিলে ওকুলে নরণার্থী নিবেক।
সিয়েন্দোই তর কি? যা কাম তে গরে।
সরণার্থী যেই পেলে আমা কোচপানা কি থেব?
তর কধা কিচ্ছু ন’ বুঝঙর মুই। কি কধে চাস গমে-দালে ক্হনা।
রেদোত বারে উথ্যং।
আ ন’ দরাচ?
নাদেই।
মুই অহ্লে রেদোত উধিলে গায় গায় উধি ন’ পারঙ। একজন সাঙেত লাগে।
দিন্মাইন্যে কুধু পেবে গোই সাঙেত?
তুই কুধু গেলে দে!
ইত্তুক চানে আহ্ঝি কল’, মুই কি ত’ কায় এক্কুজান আঘঙ?
অ।
আমা আদামানি কায়-কুই। বো হঝা গেলে দিনে যেই দিনে এপারিগোই।
মান্যে সান্যান মা দাগিবাত্যে দে।
সিয়ে না বেজ এক্কুদিনে মেলা সির যেব’। তেঙা বাঝিবাক।
তর তেঙাত্যে! গোদা জীঙকানিআন সান্যান বাব দাগা খেলে বুঝিবে। অয়চে, রেদোত কি ওইয়েদে?
রেদোত উক্কু ভিরেজে কানাত্যে সুনঙগে।
কি?
অয়দে।
তে কি অভ’?
আ কি অধ’।
আমা কোচপানা?
কিজেনি।
তুই মে কোচ ন’ পেবে?
অয়দ’ রূপসী। মুই তরে কোচপানা ম’ পরানত্তুন বেজ। তরে ন’ পেলে মুই মুরিম।
আ সালেন?
মান্যে কন্দে, রেদোত ভিরেজ কানিলে ভিলে আদাম ভাঙালা পরে। ইন্দি টালী পুনো দাগী এক্কুজান সরণার্থী নিবেত্যে কধন। সরণার্থী যেই পেলে কনে কুধু থেই পেইয়্য। আ কনে কুন্দি ধেই যেই পেই। ইয়েনি ভাবদে ভাবদে রেত্তো ঘুম যেই ন’ পারঙ।
তুই এক পাগল। কায়-কুয় আদাম। ধেই পেলে এক সমারে ধেবং।
সিয়েন ত’ কধা।
আইয়্যে ম’ কধা। সালেন মে ফেলেই যেবে?
সিঙিরি ন’ কোচ না রূপসী।
নয়দে চিদেনি ন’ গোরিচ।
অয়দে বো, অয়দে। বরকল’ সিন্দিউনে সরণার্থী যেই পেয়ন। সুনঙ্গে, পত্তিদিন বার’- চুদ্ধজন মানুচ মরন।
হামাক্কায় ধেই পেলে, তুই মরে তগেই তগেই যেই ন’ পারিবে?
তগেইদ’ পারিম। হালিক কুধু তগেম? স্বয় সাগচ্যে মান্যইদু কুধু তগেম্বোই!
তুই চিদে ন’ গোরিচ, কোচপানা কন’দিন ফারক ন’ অয়। ধেই পেলেও একদিন নয় একদিন দেঘা অভং। ভালদ্দুর এলে। ওইয়ে আর যা ন’ পারি আর। ঘরত যা।
তরে ফেলেই যেবার মনে ন’ কর।
তরে অহ্লে সবপ্পানত এসান্যে। যা, মুই ঝাদি এমবোই। চিদে গোরি ন’ থেচ। মুই আঘঙ, থেম। মুই তর, কারর নয়। মুই তরে কোচপাঙ, কোচপেম। যিদু যেদুঙ সাত, ত’ ইদু এম। তরে নিনেই গিরিত্তি গোরিম, এবার অলদ’?
ইত্তুক চানে আহ্ঝি আহ্ঝি রূপসী মু কিত্যেন্দি চেই আঘে। ইত্তুক চান’ মুুওত আহ্ঝি দেঘি, রূপসীও আহ্ঝিল’। তারা দ্বিজনে ইহ্’ল অহ্’য়সং কধা কলাক। থাজি কধা কোইনে ফারক অহ্দে ইত্তুক চানে কল’, রূপসী মুই অহ্লে ত’ আহ্ঝা থেম। রূপসীও কল’, মুইও থেম।
ইত্তুক চান’ আ রূপসীর আঝা থেলেও রূপসীর তা আজুদাঘীদু যানা এক দিন বাদে ধেই পেলাক। গোদা মেয়োনী চাগালা মানুচ্চুন ধেই যেই পেলাক। ভারত যেইনে সরণার্থী ওই পেলাক। ভারদত কয়েক্কান জাগাত চাঙমাউনরে সরণার্থী গোরি রাঘেইয়্যে ভারদ সরকাচ্যে। ইত্তুক চানে তা কোচপানা রূপসীরে ভারত যেইনে তগেই সুপ পেইয়্যেগোই কিনা, যুনি সুপ ন’ পেলে ভারদত্তুন ফিরি এচ্যে শরণার্থী লগে ফিরি এল’ নাকি রূপসী। ইত্তুক চান্দোই রূপসী দেঘা দেঘি অহ্লাক নে, ন’ অহ্লাক? পাপি অহ্লাক কিনা?? পাপি অহ্লে আ’মন’ দেঝত এইনে কেনে আঘন, কন্না কোই পারে???

ত আঝায়

গল্পকার: কে.ভি দেবাশীষ চাকমা
* সলাই-প, জাক-২০০৯ খ্রি:

Spread the love
RannyePhul

Explore Chakma Literature, Culture & History

https://rannyephul.com

Leave a Reply

Your email address will not be published. Required fields are marked *