দেঘা অহ্লেও ওই পারে (ছোটগল্প)

ঘর’  কায় মরা গাচ্ছোত এক্কুজান ডগরেগি ঘচ্ছে টাগা পেক্কো। দেবাবো এক্কা মেঘ মেঘ গরলে তেহ্ লুমেগি। মরা ঢেলাত পরে। এগজা ডগরে। দিন্নো  ন’ এযে কলে সাত-আট্য পল্লা এযে পারাপাং। এলে কোই পারং। চুবে-চাবে ন’ থায়ি। তা র’ বো কেসান্যে, কেধক্যেন গোরি ডগরে সিয়েনও মুই কোইদি ন’ পারিম। বানা ডগরেদিয়্যেন কোই পারিম্বে। মরা গাচ্ছো ঢেলাউন বেজভাগ পচ্ছোন বুয়েরত। মুর গাচ্ছো আঘে আ তিন্নো ঢেলা আঘন। সিত্তুন উক্কু অর্ধেগত ভাঙে। মরা গাচ্ছোত ন’ চিনোং কি গাঝ। ঘর’  আদে-কাজে স্বয়-সাগচ্ছে গাঝ আঘন এনে। ফাঁগে ফাঁকে দ্বিবে উক্কু কাত্তোল গাঝ, আম গাঝ আঘন। বাদাম ফোগোনা গাঝ উক্কু আঘে। সেই গাচ্ছোউনোত কুরল্যে, জোরবো পেক, অগলক, এ্যাল পেক, কহ্, বরুনি, ভেলা লাগা, ছত্তা পেক, খাদি ভিরেজ, বালু পেক, সুদত্তটুপি আ নানান পেক পরন্নি। এযন। বানা মরা গাচ্ছোত তিন জাতে পেক পরন। ঘচ্ছে টাগা, সেদধবা আ নাদেংকুত্তি পরন। অক্তে অক্তে এনে শিঘিরেবোও পরেগি। তেহ্ এলে গাঝোত থান্দে পেক্কুন চোঘে চোঘ, পরান চোক চোক সজাগ গোরি থান। বানা খাদি ভিরেচ্ছুনে এক্কা নিচিদে গোরি থান। আ যু পেলে শিঘিরেবোরে লাদি মারন্দোই। বেজ লাদি খেলে তে শিঘিরেবো সিত্তুন ধেই যায়। নানা পেগোর কানসুগ ডগরানিয়ে পত্তিদিন বেন্যে অহ্লে মর ঘুম ভাঙে। চোঘ পুঝি পুঝি ঘর’  বা’রে গেলে দেঘং গাঝে গাঝে নানাবাবত্যে পেক। কিয়ে পুক খাদন। কিয়ে ডগত্তন। কিয়ে উরোদন। কিয়ে আঘন ঢেলাত পরি। কিয়ে উরি যাদন। কন’ কন’ পেক জোর জোর। তারারে দেলে মত্তুন গম লাগে। ঠোট্টুন্দোই আল্যাঙ গরা-গোরি গরন।

এচ্যে মর ঘুম বেজ ওইয়ে। কক্কে পহ্র ওইয়ে মেদ ন’ পাং। পেগোর কিজিক-কাজাগতও মর ঘুম ন’ ভাঙে। বেল উধি ফরাগ ফরাগ গোরি রোদ বাজেইয়ে। তে মর ঘুম ভাঙেদে। রেদোত ঘুম যাদে মর দেরি ওইয়ে। কেল্যে মর জীবনত এক্কান ঘটনা ঘত্তে। সিয়েন অহ্লদে, মুই কলেজ থাগদে উক্কু মিলেরে অম’কদ’ কোচপেদুং। বানা তারে কোচপেদুং সিয়েন নয়। তেহ্য়ু মে কোচপায় কধ। কিজেনি তেহ্ মে যদ’বদে কোচপেয়ে কি-না। হালিক মুই তারে দুনিয়েত যিদুক্কুন চাঙমা মিলে আঘন, বেগত্তুন বেজ তারে কোচপেদুং। কোচপেয়ং। তাত্তুন বেজ দোল আ গম মিলে দ’ এলাক। আঘন। হালিক তারা দ’ মে কোচ ন’ পান। কোচ ন’ পেবাক তা সান্যে। আ দোল দেঘানা দ’ ওকুলে আহ্ধ ধ’গোই। সেনে তারে বেজ কোচপেদুং। তার সেই মিদে মিদে কধা। কোচপানালোই স্ববন দেঘানা, তা কায় বোই থানা। তা আহ্ধ ধোরি চোঘে চোঘে রিনি চানা-সিয়েনি ইধোত উধিলে গম লাগে। ভাবদে গম লাগে তারলোই কোচপানা বিদি যেইয়ে দিনোন নিইনে। অক্তে অক্তে তারে নিইনে কোচপানা দুঘোর কধা মনত উধিলে কানানি ঢেক এ্যাই ঝরাত গোরি চোঘো পানি পরেগি। একজাগাত থাদে তারলোই মর এক্কুজান দেঘা অদ’। তা মনান্দোই মহ্ মনানত ফারক ন’ অয়। তেহ্ পরিবাত্যেই ঢাকাত যানাত্তুন ধোরি তা মনান মহ্ মনত্তুন ফারক ওই যেইয়ে। পত্তম পত্তম ঠিক এল’। বঝর বিদি যাদে তেহ্ মে ফোন কম গরে। ঘরত এলেয়ু মরলোই কম দেঘা গরে। দেঘা অহ্লেয়ু বেজ কধা ন’ কয়। এসান্যে গোরি ফোন গরা গোরি ন’ গত্তে গত্তে এনে এনে গাই গাই ফারক ওইয়ে। কয়েক বঝর পরেদি শুনিলুং, তার ভিলে চাগরি ওইয়ে। থায় ঢাকাত। মুই আর কি গোরিম! মা ধোচ্ছে এক্কুজান বউ বউ। তারা চেই-ছিদি মরেন মদন গোরি মিলে আনি দিলেক বউ। তেহ্য়ু নেই যক্কে, তেহ্ যক্কে মে কোচ ন’ পায়, মর জনমর সমারি ন’ অভ’ যক্কে, মুইয়ু মা-বাবে আনি দোন্দে বউবো মাধা পাদিলুং।এ ভিেিদর এক্কান চাগরি পেয়ং। মরদ উক্কু মিলে উক্কু আন্না বাচ্চা পেয়ং। দিনোন গম যাদন, গিরিত্তি সংসার নিইনে।

আদেক্যে গোরি তেহ্ কেল্যা আমা অভিজোত লুমিলোগি। মহ্ গুধি দোরোত ঠিয়ে কোইয়ে, এ্যাই পারং?

মুই সক্কে মাধা নিঘোরি নে-আলসি গোরি কাম গরঙর। এ্যাই পারং কধান শুনি, দোরো মিক্যে ন’ চেই কলুং, আয়। মুই মনে গোচ্ছোঙগে আমা অভিজো মিলেবো ফাইলোার সাইন লভাত্যেই এচ্ছে। দিন মাইনে এই ফাইল, ও ফাইলোত সাইন লো এযে। এই সেনে আয় কলুং। আবাদা গোরি কি মনত উধি মনে মনে ভাবিলুং, ওমা! ইভে দ’ আমা অভিজো মিলেবো র’ বো নয়। কন্না এল’! র’ বোও চিনং চিনং মনে কল’। আ এবাত্যেই কলুং। মাধা উজো গোরি রিনি চাঙে- ওমা, তেহ্ এনা! সেই বার’   বঝর আগে যারলো মর ফারক ওইয়ে। আ তার কি অহ্ল। যে মিলেবো মরলোই দেঘা ন’, কধা ন’ কয়। মে কোচ ন’ পায়। মত্তুন গাই গাই ফারক ওই যেইয়ে সে মিলেবো এচ্যে গারে গাই মহ্ ইদু এচ্ছে। আ কন মোরোত মু ধ’লগোই! এধক বঝর পরেদি এলদে। চিনোদে এক্কা দিমে দিমে ওহ্লুং। গাভুরো মুও চেঙেরা থেলেয়ু কেয়্যা ধক্কান লরি যেইয়ে। দাঙর আ পত্তা ওইয়ে। রাঙা-চাঙায়ু ওইয়ে। চুলান বাদি গোরি কাপ্পে। শারি পিন্যে। কল’, বঝং।

মুই কি কোম! এক্কে আমক। আবাদা গোরি দেঘা। পরান ঘরান ধুম ধুম গরের। রাগ উধের, না খুঝি ওইয়োং, না বিষ দেঘঙর কিচ্ছু বুঝি ন’ পারঙর। বঝ কলুং।

কাম’ চাব বেজ?

অদেই।

মত্যেই কাক্কন কাম থোই ন’ পারিবে?

মুই তারে ন’ চিনোঙগেসান গোরি কলুং, তর অভিজোর কাম থেলে স্যার’ সিদু যেই পারচ। স্যারে এজাল দি পারিবো, তর কি গরা পরিবো।

অভিজো কামে নয়, নিজো কামে।

এক্কা ঢেমাক গোরি কলুং, নিজো কধা কবার জাগা ইয়েন নয়। ইয়েন অভিজ।

মহ্ কধান শুনি তেহ্ মাধা নিঘোরি কল’, কোই পারং। কেঝান আঘচ?

গম।

মুই কেঝান আঘং, পুঝোর গোরিবের মনে ন’ কর?

গম আঘচ। গম আঘন সেনে দ’ ইদু এ্যাই পাচ্ছোস।

তেহ্ এক্কা মু চিমে আহ্ঝি কল’, এধক বঝরসং মহ্ উগোরে তর এব’ রাগ আঘে? ওইয়ে আয়, দোশ্চান মর। মুই তত্তুন গাই গাই ফারক ওই যেয়োঙগোই। তরে ন’ কং। ন’ মাধাং। জোস গোরি লুগি যেয়ংগোই।

ইয়েন অভিজ। ঘর নয়। পার্ক আ বেরান্যে ঘরও নয়।

বুঝিলুং দ’। কাক্কন, বানা কয়েক্কান কধা কোম্বে। তে যেম্বোই। ভালক বঝর পর দেঘা, এক্কা নইও আহ্চ্ছে! আগে দ’ দেঘিবেয়ু বেগদ গোরি আহ্ঝস।

সেই আহ্ঝিবো কারি নেয়েন্দোই।

অঁ। তেহ্ কাক্কন চুব গোরি থেই পুঝোর গল্য, পুও-ঝি কয়বো পেয়চ?

দ্বিবে।

মিলে নে মরত?

মিলে উক্কু, মরত উক্কু।

কুবো দাঙরবো, মিলেবো?

নাদেই, মরত্তো।

কি নাঙ রাঘেই ধোচ?

ইয়েত।

মিলেবোর?

ন’ মাধি থেলুং। তারে দেঘি পত্তম পত্তম রাগ উধের নে, খুঝি ওইয়ং বুঝি ন’ পাল্যেও, যক্কে কধা কুও ধচ্ছে সক্কে মত্তুন রাগ উধের বনা বনা। মাধা গরম ওইয়ে। তাল্লোদি গরম ভাপ উরি যার। আ ইয়েন-ওবোন পুঝোর গরে। মনে কত্তে ডেন গালে, বাঙ গালে ফিরে ফিরে চুগোরেবার। জগারত পরান ঘরত্তুন ঠাগুর জাগাত লারেই দিবের। তুও কোয়ং, ইয়েন অভিজ। তুই যাগোই যা। যেই ন’ যায়। কল’, ইয়োত থেবাত্যেই দ’ ন’ এযং। হালিক কয়েক্কান কধা ন’ কোইয়ে বাদে দ’ ন’ য্যেম। তেহ্ কাক্কন ন’ মাধি মাধা নিঘোরি থেই আ মাধা উজো গোরি মরে চেই কল’, শুন্যং, তুই ভিলে মরে যিয়োত লাগত পাস সিয়োত মারেই ফেলেবে। সেক্কেও এনে কধে. তত্তুন ছারি গেলেগোই পিত্থিমিত নাকি মরে ন’ রাঘেবে। সে রাক্কান এব’ আঘেদে দেঘঙর।

ইও, সেক্কানি কধা ন’ কোচ। জোস গোরি যাগোই।

মহ্ কধা ন’ শুনিবে?

ত কধা শুনিবের মর আওজ নেই।

আগে দ’ শুনিদে। ফোন গোরিলে. থঙর কলে, কধে, আ কাক্কন কনা। এধক কি যাদি যাদি। তেহ্ ব-নিজেস ইরি দিই, মু চিমে আহ্ঝি কল’, শুন সালে মহ্ কধা। ইদু থাক্কে যেন তরলোই মর দিন মাইনে দেঘা অদ’। কধা অদ’। তরে এক কাক্কন ন’ দেঘিলে পরান বিরুং বিরুং গত্ত। চিদ ন’ ভিঝিদো। আগল-পাগল ওদুং তরলোই কধা কবাত্যেই। ঠিক সেধক্যে গোরি ঢাকাত যেইনেও মর আ উক্কুলোই ওইয়ে। তা নাঙান ন’ কোম। তা নাঙান মহ্ মুওত্তুন নিগেলেবার ন’ চাঙর। তা নাঙা শুনিলে মর মাধা টন টন গরে। রাগ বুগোত ন’ আ’দে। ইক্কে মুই তারে বিষ দেঘঙ।

ইয়েনি শুনি মুই চুব গোরি থেই ন’ পারি কলুং, এধক আওজে ললেগোই, আ কি বিষ দেঘানা। গম কাম দ’ গোচ্ছোস। মুই তর পরালেঘা খরচ দোং, ললেগোই আ উক্কুরে। কি গম মিলে তুই।

সিয়েন অয়, ত খরচে মুই লেঘা শিক্কোং। সে তেঙাউনোত্যেই ভালক্কানি চিদিও লিক্কুচ। মুই কন’ জোব ন’ দোং।

তুই ত নেক্কোরে সিয়েনি ক’গোই। মরে ন’ কোচ্ছি।

তারে কবার কন’ যু নেই আর।

আইয়ে?

সাত বঝর আগে তারলোই মর ছারা-ছারি ওইয়ে।

ও, সেনে মহ্ ইদু এযানা?

না, সেনে নয়। তরে নিইনে মহ্ মনান এক্কুজান লাট্যালাট্টি গরে। কোচপানা বিশ্চেত তরে ঠগেইয়ং। সেনত্যে মুই এক কাক্কন সুঘ ন’ ন’ পাং। সেনে তত্তুন খেমা চেবাত্যেই এচ্ছোংগে। মুই কোই পারং, তুই মরে খেমা গোরিবে।

তেহ্ চানা কধান সলাত আমা অভিজো মিলে এ্যাই কল’, স্যার এ্যাই পারং?

আয়।

দাঙর স্যারে তরে ডাঘের স্যার। তা সিদু যেবাত্যেই।

যা, মুই এযঙর কোইনে, ওতেরে কলুং, থাক, স্যারে কিত্যেই ডাঘের চা যাঙর। ইয়েন কোইনে মহ্ গুধিত্তুন নিগিলি গেলুং। যাদে মনে গোচ্ছোং, কাক্কে এ্যাই পারিম্বোই। তেহ্ও পুঝোর ন’ গরে কক্কে এম্বোই। সার’ সিদু যেই এই সেই কাবোজোত সাইন গত্তে গত্তে। লেঘানি পরি চাদে চাদে আ অভিজো তেম্মাং গত্তে গত্তে অভিজো অক্ত খরেই যারলোই। তে কামানি থুম ওইয়েদে। স্যার’  গুধিবোত্তুন নিগিলি এ্যাই মহ্ গুধিত এ্যাই চাঙে, তেহ্ নেই। যেইয়েগোই। অভিজো মিলেবোত্তুন পুঝোর গোরি কোই পাচ্ছোং, তেহ্ ভালক্কন আগে যেইয়েগোই। এই সিয়েনি ভাবদে ভাবদে কেল্যা মর ঘুমে ন’ ধরে। বিচ্ছনত ছাত্তে ছাত্তে র’য়োং। সেনে বেন্যা ঘুমোত্তুন উথ্যে দেরি ওইয়ং।

গল্পকার: কে ভি দেবাশীষ চাঙমা

তথ্যসূত্র: সবুজ অরণ্য, ১ম বর্ষ, ২য় সংখ্যা, নভেম্বর ২০১৯

Spread the love
RannyePhul

Explore Chakma Literature, Culture & History

https://rannyephul.com

Leave a Reply

Your email address will not be published. Required fields are marked *