পত্তমত যুনি তুই এদে (চাকমা কবিতা)

-মিনা চাকমা

বানা সবনর রেজ্যত নয় পত্তমত যুনি তুই এদে
লাঙ্যে মেয়্যের দিগোল কোচপানালোই ইরুক রাধামন অনেই,
ফুলো খাদি বুগোত বানি সামোলেজর চাবোগীর সোজ্ পিনোন পিনিদুং
খেঙগরং লোই বাচ্ছেই থেদুং ইজরত বোইনেই।

বানা ভাবনার সাগরত নয় পত্তমত যুনি তুই এদে
খাদি সিলুম উরি ধুদি পিনি পুনোংচান’ বাজিবোলোই,
আজুলি আ থেঙত্ খারু পিনি তান্যেবির দগে সাজিদুং
উমরোত্যেই সদর ওদুং চেঙ্গে মেয়োনিলোই।

বানা খাক্কন্যের পোত্যে সবনত নয় পত্তমত যুনি তুই এদে
পুগো বেলর পহর্ ছদক ফুদেনেই
দিচোগোত্ নুও সুগোর সবন দেগি মুজুঙে উজেদুং
হারেবার ডরে পিচ্ছে ন’ লামিনেই।

বানা ফাগুনোর পেইক্ নয় দিম্মাগানে ঘুম ভাঙনির পেইক্ যুনি অদে
ঘুমোত্তুন জাগেই দিদে ত’ নোনেয়ে মিদে র’লোই,
কাম্মোবির লগে পোত্যে কো গাঙত্ যেদুং
মাত্যে কুম্মো কঃরত্ লোই।

বানা বোঝেগর ফুল নয় উমোরবু ফুদিবের যুনি অদে,
দোগিনো মাত্তল বোয়েরে
জাদর তুমবাচ্ নিগিলেই পারিদং
আহ্ধেই পারিদং অঝার ধুও পহ্ধে।
বানা সবনর রেজ্যত নয় পত্তমত যুনি তুই এদে।

পত্তমত যুনি তুই এদে

✍️ ২৮/০৪/২০২১ ইং

Spread the love
RannyePhul

Explore Chakma Literature, Culture & History

https://rannyephul.com

Leave a Reply

Your email address will not be published. Required fields are marked *