বনলতা সেন (কাব্য অনুবাদ)

মূল: জীবনানন্দ দাশ

চাকমানুবাদ: নীতিশ চাকমা

পিত্তিমির পধে পধে মুই আহ্’দঙর আঝার বজর ধরি,
হদক জাগা বেড়েইয়্যং;বিম্বিসার অশোগরে পুঝোর গরি।
সিংহলর জাঙাল ফুরি মালয় মুরো উদি রেদো আন্ধারত-
সিধু এলুং মুই;আঙুস্যার ঘুপঘুপ্যা আন্ধার বিদর্ভ নগরত।
অরান অইয়্যঙ মুই;তোগাদে রিপ-রিপ জীংহানির হেন-
আবাদা হি সুঞ্জুক দিলো হিজেনি হানক্কন বনলতা সেন।

মেন-মেন হালা চুলানি তাঁর ঝুদো ইরি দিনেই থয়,
দেলে তাঁরে পিত্তিমির বেক সিনেলি লারু-মারু অয়।
তাঁর ছদক্কান পড়িলে থামি যাই জুরো গরি দোর্জের গঙ-
হি গরিনেই;হিঙিরি অল?এধক গরি তা’মুয়ান শ্রাবস্তীর রঙ।

দাল-চিনি ভিদে সিধু দেক্কোং তারে এক্কা গরি আন্ধারত,
সে জেরেন্দি আর ন’এযে ফিরি সবনে পত্থমে ম’জীবনত।
বৈয়ার নালে হবর দিনেই হোইয়ে হুধু এলে এধক ভিলোন?
মুই হোইয়্যঙ তারে মন বার্গী চিদত্তুন মন’দুগে মরি যিয়োন।

তুও মরে হোচপেই চিৎদিগোল নাগর মাদি বুঝেই দিলো-
জীবনর ফেনাচাগ আড়াচাগত তুলি দিবার হোজুলি গরিলো।
মনে গরঙত্তে হুগির মিধে-আড়ি পাই পারা অইয়ে মর যেন,
পেগো সান চোগ তুলি ছাবা দি পারে নাটোর বনলতা সেন।

দিনোর বেল ডুবোং ডুবোং অক্তত রিপরিপ গরি দেগা যায়,
নাদেং পত্তি উড়ি যাদে বেল-অ রঙান লারে গরি মু-চিমায়।
জীংহানি ওই যাই আলা-বনর শিরো পানি আবাজর সান,
বেল পুগো র’শুনি সোজেইনে দুগুত দুগুত গরে পরানান।
সারাল্যা চিল্লো দুয়োত্তুন রোদোর তুম্বাচ পুঝি ফুরেলে-
সাঝ লামেগি;আন্ধারান বুগোত হেলান-দি পল্লাপল্লি হেলে।

পিত্তিমির বেক রংধং মরি গেলে পাজে পাজেত্তর সমরি লয়
সেক্কে জীংহানিত্ জুনিপুগ রঙে ঝিমিলানি আরগানি অয়।
হুয়োত্তুন পানি হেই পেক্কুনে আমত্ ফিরোন তিরোজ মারেই-
যার যার পদে বেক্কুনে যান্দোই হামর বাগ ইত্তেবা দিনেই।
ফিবলগ অনেই থুম অয় জনমত্তেই ঈঝেবর বেক লেনদেন-
পড়ি থায় বানা দুন্ধুগোর তিরোজ হামেরেই বনলতা সেন।

৫/১০/২০১৮ ইং

বনলতা সেন

Spread the love
RannyePhul

Explore Chakma Literature, Culture & History

https://rannyephul.com

Leave a Reply

Your email address will not be published. Required fields are marked *