বিজোল সবন (চাকমা কবিতা)

– সুজন চাকমা (জুম্মধন)

সেক্কে কিচ্নচুরো ফুললোই পত্থান সাজেয়্যে এল
মনে অহ্দ যেন ফুলো বিচ্ছোন।
সে পধত এক সমারে আহ্দানার সুক এল
কিহ্ এক বুঝেই ন পাজ্জি সুক!

কোহ্ই পারচ? সে কিচ্নচুরো ফুলুনে মরে এভ দাগন
সে পত্থানে ম থেঙখুচ ধারাচ গরেহ্,
সে সমারে তরেও।
খালিক, তুই মরেহ্ ন দাগচ আর আগসান
ধারাচ ন গরচ ম দ্বিআন আহ্ত।

অহ্লে নুও ফুলোর দোল রঙর মাত্তলে
মরেহ্ ইহ্ধোত তুলিভার পুরি ফেলেয়ুচ,
তুও পুঝোর গরিভার মনে কয়-
তর কি এক্কাও মনত ন উধে
ত আহ্দত মর ফুল গঝানাআন?
নাকি, সময়র গঙারে ভাজে দ্যচ
ম নাঙে উচ্চোরেয়্যে কোচপানান?

যেদিন্নে ম মনত ফুলোর গাপ্পোই ত নাঙান লেখ্যং
সেদিন্নে কোচপানার তুম্বাজে ভরি যেয়ি ম উধোনান।
সে তুম্বাজে মুই মাত্তল, মাত্তল থেম জনমান
গারেয়ুং তরে ভাবি কধক বিজোল সবনর আঙ।

বিজোল সবন

✍️ ২ মে, ২০২২

Spread the love
RannyePhul

Explore Chakma Literature, Culture & History

https://rannyephul.com

Leave a Reply

Your email address will not be published. Required fields are marked *