মুই লারমা কঙর (চাকমা কবিতা)

– বিকেন চেগে

পজিমত বেলান আহলেয়ে,  তেচ, সধক কমি কমি এঝের;
পেক্খোন বাঁত ফিরদন, বানা মর ফিরানা ন’ অহর ঘরত।
চেরে পুক্খোন দাগন, আলসি পেজায়ে দাগে অক্ত এলে
বানা মর অক্ত ন’ এঝে ঘরত ফিরিবার, খাক্খন জেরেবার!
পুন্নিমাত জুনোপহরে ভোরি যায় সিদ্ধুর পিত্থীমীর;
যিদ্ধুর চানর চান্দবী লুঙেগোয় যিধু-সিধু।
আঙোচ্ছেত আন্ধার লামি এযে, আহজি যায় সুধোমে
বানা মর সুধোম ফিরি ন’ এঝে, বানা খাক্খন ঘরত ফিরিবার!

অহলে মর, ঘরানত ফিরানা ন’ অহব’ দেঘানা ন’অহব’ তারে
কায় তার বজাণা ন’অহব’,  মাদানা ন’ অহব’ চিজিক্কোরে!
ঝলা বোগি ভাঙাবাজ্জে এ মুরোত্তুন ও মুরোত্তুন চোরি যাঙ
ছরাছুরি, জুরোজুরিহ্, জুমো বীথিয়ে আহদি যাঙ
এ লারেয় দ’ বানা মত্তে নই, বানা তাত্তে নই যারে কোচপাঙ
এ লারেয় দ তারাত্তে যারা পরত্তলে তোচ্ছে খাদন।

মর ইক্কে খুঝর চিন, মুরোল্যা মুরোর মুরোয়ে মুরোয়ে ;
গাঙত, ছরা কুলোত চিন্যা ন চিন্যা আদামে আদামে।
মুই মরে কোচ ন’ পেলেও, মত্তে মুই ন’ ভাবিলেও তারাত্তে ভাবঙ
সেত্তে- অহলে মর ঘরত ফিরানা ন’ অহব’ আর্,
জুনোপহরান থুম অহ্দে, চান্দবী লুগী যাদে
মুইও লুগি যেম, আঝি যেম।

মুই লারমা কঙর

✍ ২০.৪.২০২০

Spread the love
RannyePhul

Explore Chakma Literature, Culture & History

https://rannyephul.com

Leave a Reply

Your email address will not be published. Required fields are marked *