মুই (চাকমা কবিতা)

– বিকেন চেগে

যুনি মরে কন’দিন পুঝোর গরচ-
মুই কন্না, সালেন মুই কোম।
মুই-
শাঝগর চোঘর ঘুম ভাঙিয়ে,
অন্যায়র রুবোঘর ভাঙি দিয়্যে
অচেদন মানঝোর চেদন দিয়্যে
খরানর তিরোজত, তিরোজ ধাবেয়্যে।
রাজপধর মিশিলর তাত্যা শ্লোগান
জাদ জদনীত মুই এক্কান নাঙ!

মুই-
মেয়োনী, চেঙে, কাজালং, বড়গাং,
সাঙ্গু, মাতাম্মুরি, লামা, গাঙ’ নাঙ।
জুম ইজোরত ধুধুক, শিঙে, বাঝি র’
নুও তম্বার মনত চেদনর পহর লুর’!
মুরোল্যা বুঘর থানপানার এক-নাঙ
তের’ মা ভাঝ ইধু, যারে ভঝান কোচপাং!

মুই-
বিজগগিরির ফেলে যেয়্যা জেরতম্বা
তের’ জাদর দিচোঘত আঝার বোম্বা

নুও দিনর পোত্যা বেলর উম ছদক
শাঝগর নাঙে “মুই নাঙ” রম’চক্র মিজিলিক!
দিবুজ্জে বেলর তাত্যা- খে ন’পাজ্যে রোদ
বার’ মাঝ’ খরান রাজা রম’চক্র চোত।

মুই-
এম.এন লারমার ফেলে যিয়ে আত্থের
শত্রুর চোঘোত চেদনর পারমানবিক বোম।
বর্মামুরোর জলজল্যে তিরোচ্ছে আগুন
আদেক্যাগরি জলিউত্থে রম’চক্র দাবানল!
এলেধনেয়্যা বন্দায়র এলেধর জল্যা তারা
বিজগর পাদাত গারে যেম দর’মর’ গাড়া।
মনত রাঘেচ, ন’ গরিচ তুই বেচ বাড়া!

Spread the love
RannyePhul

Explore Chakma Literature, Culture & History

https://rannyephul.com

Leave a Reply

Your email address will not be published. Required fields are marked *