সবনর কজমা গাবুরী (চাকমা কবিতা)

– সুজন চাকমা (জুম্মধন)

বেল ডুবোন্দি অক্থত্ হ়াদঙর গাই গাই
দুরোর মোন মুরোউন লাগে যেন কাই কাই,
রাঙা বেলানে ডুবেল্লোই মরে চেই চেই,
পিঝেদি কন্নাহ় যেন এযের পারাপাং
রিনি চেলে নেই নেই, কিয়োই নেই।
এচ্চি যেন ঝাদি লামি এযের আনধার
রিনি চাং বেলান পঝিমেদি বার বার,
নিবিলি ঝারানিত্ বেল’ পুগে ডগত্তন
ঝাক ঝাক পেক্কুনি তারা বাঃত্ ফির’দন।
মাত্তর, মুই? কিজেনি মুই কুধু যাঙর!
এচ্চি মুই বানা থুচ থুচ মুজুঙেদি হ়াদঙর।
বেল’ পুগে ডগত্তন ইয়াং ইয়াং গরি
পরানর কন’ ডর নেই, গেলে যাং মরি।
মুই মাত্তল কন’ এক কজমা গাবুরীত্তেই
উজে উজে হ়াদঙর মুই বানা তাত্তেই।

যেক্কেনে বেলান লুগিল’, জুনান উদিলু
সেক্কে মর পাচ্-পরান জুরেল’, সন মরিলু।
পুগো কিত্তে মু গরি ইজোরত বঝি আঘে
ঘুর ঘুর গরি মুআন  তার দেঘে,
কিজেনি তে কারে নিনেই ভাবে।
জুচ্ জুচ্ গরি গেলুং, সাঙুআনত রলুং
খাক্কন যেরে তারে, আ কি ভাবর কলুং।
ডর ডর গরি পিঝেদি চেল’ তে রিনি
কল’- যানেহ্ দ ডরেয়ুং কিত্থে এযচ্ এঙুরি?
সেক্কে তার দিবে চোক্ পান্যে পান্যে গরি
কি যেন কধ’ চাই ম দিআন হ়াত্ ধরি;
র নেই মুওত্, চোক্কুন বানা চোঘোত্
ভালক্কন যেরে মাদিলু, এক্কা এক্কা হ়াঝিলু
এধকদিন যেরে ঈদোত কেনে উদিলু?
সেক্কে মুই বুপ্, বুঝেবার ভাচ্ নেই
থেবত্ থেবত্ গরি রলুং বানা চেই।
সে রেদোত্ সমার হ়ল’ পোতপোত্যে জুনপহ়র
আবাদা কলুং, এচ্চি রেত্তু বানা তর আর মর।

কন্ দুঝে মরে এধকদিন দুঘোত্ রাঘেলে
মরে ছারা থেই পারিবে কেনে ভাবিলে।
মুই জানিদুং পরান দা, তুই এবে ফিরি
বাঃরাত্ আবুজি কল’ কজমা গাবুরী।

চোক মেলি চাংগে ফদাংতাং পহ়র
কুধু গেল গাবুরী, কুধু গেল জুনপহ়র?
নিমোন নিমোন নাগর কাল্লোই মাদিলুং
এধক দুক গরি তা ইধু গেলুং;
ধুম ধুম গরের পরানান মর
কি যেন আহ়রেলুং হ়ামক হ়োই ভাবঙর।

সবনর কজমা গাবুরী

✍️ ১৭/০৯/২০১৮

Spread the love
RannyePhul

Explore Chakma Literature, Culture & History

https://rannyephul.com

Leave a Reply

Your email address will not be published. Required fields are marked *