সেনত্তে মুই আদিবাসী (চাকমা কবিতা)

– নিপুণ চাকমা

ভাজ আঘে,অরক আঘে,
সেনত্তে, মুই আদিবাসী।

রিদি আঘে,সুদোম আঘে,
সেনত্তে মুই আদিবাসী।

লেই আঘে,কাল্লোং আঘে,
হক্রেং,ভেরা, কুরুম আঘে।
সেনত্তে, মুই আদিবাসী।

ধুমোত টাঙেই সরোন তারা,
লুধুং ভরন আঙরমাছ তারা-
টাঙেই থং।
সেনত্তে, মুই আদিবাসী।

সাজিত তলে দোন বানং,
বারিজেত কাবর সুগোঙ,
সেনত্তে, মুই আদিবাসী।

ইজোরত থং পিলে-আহরি,
দারবো ঘরত থং দারবো সমরি।
গরু ঘরত থং গরুবানি,
ওলোন সালত মগা-পুজনি।
সেনত্তে, মুই আদিবাসী।

মেলা মেজবানত গেলে,
তলোই বিজেই,
মেজাঙত,ভাত খাঙ,
সেনত্তে, মুই আদিবাসী।

মোনো ঘরহ্ ফুগুধি কানান্দি চেই থাং,
ভুর মাদাতদি বালোচ বানাং,
ওজোলেঙত ঘুম জাং।
সেনত্তে, মুই আদিবাসী।

জুমো সংমধ্যে-
মোনো ঘর তুলোঙ।
তাক তানি,বাদোলমারি,
পেগ-রাগাঙ।
ঘুত্ত‍্যে মুগুরেই শুগোর রাগাঙ,
সেনত্তে, মুই আদিবাসী।

পেজাং আগে,ওলোনশাল আগে,
ওজোলেং আগে পিজেদি।
সাঙু বেই ঘরত উদোঙ,
ইজোর তুলোঙ মুজুঙেদি।
সেনত্তে, মুই আদিবাসী।

ছড়া ছড়িত, লুইলোই-
ইজে,মাছ,হাঙারা তোগেই খাং।
ঝড়েহ্ বানে,
জুমোর মাদাত দি কামত জাং,
সেনত্তে, মুই আদিবাসী।

মোন মুরোত, ঝাড় কাবি-জুম গরঙ,
ভাত মজা বানি কামত জাং,
আরা কাজেই-
কুরুম পুনোত,ধান কুজোং।
সেনত্তে, মুই আদিবাসী।

মাধাত খবঙ বানি-
কাল্লোং বুগি ধান কাবং।
আলক ঘরত,
চাবারা বুনি-
থনি ধরি ধান মারং।
সেনত্তে, মুই আদিবাসী।

ধুধুক,শিঙা,হেংগ্রং আঘে,
মাধাত খবং,টেইন্ন্যে আঘে,
মাহ্ বুগোত খাদি আগে।
সেনত্তে, মুই আদিবাসী।

পান আলু,কোয়েংআলু,
রেং, মু-আলু,
ঝারবোহুজু বৌল্ল‍্যে
রা‍নিহ্ খাং।
সেনত্তে, মুই আদিবাসী।

চুমোত -ভরেই
মাছ গোরান গরঙ,
চুমোত গুদেইয়‍্যে খাং।
সেনত্তে, মুই আদিবাসী।

কলাপাদালোই ভাত মজা গরঙ,
পেইত্ত‍্যে পাদালোই সিদোল।
কলা পাদালোই কেবাঙ গরঙ,
তোন মজাবো কি দোল!
সেনত্তে, মুই আদিবাসী।

বনজা দারু তুলি-
দারু বাদং,
বৈদ‍্য আনি
পোল্লা শুগোর দুঅঙ।
গঙা মা উদুজে
দালিবাঝা দুঅঙ,
অসীঝি কেনত বুরপারং।
সেনত্তে, মুই আদিবাসী।

রো পারি কব বানং,
শণ কাবি চাল ছিলেং,
থবাক দি ইজোর তুলোং।
সেনত্তে, মুই আদিবাসী।

পোগোনোত পিদে ছিজেই খাং,
ওগোইয়োত ধুন্ধো-দুবং,
ডিঙিত বারা বানং।
সেনত্তে, মুই আদিবাসী।

জুরগো উগুরে কত্তি থং,
ধহ হাবি চোল মাবং।
বেত ফেরি
বুনোকাদা গরং।
সেনত্তে, মুই আদিবাসী।

চরগা পাগেই সুদোহ্ কাদং,
নাদেই পাগেই তুম গরং।
সুদো নলি থুর সুমোত ভরঙ।
সেনত্তে, মুই আদিবাসী।

রদঙ কাবি বেন বাঝাং,
বুনো কাদা গরি দোই বদং,
নিজে বুনি উরং পিনং।
সেনত্তে, মুই আদিবাসী।

বরগাঙ লামনি চালেই লামাঙ,
ভুরোত গরি, ছড়া পার অঙ।
সেনত্তে, মুই আদিবাসী।

সেনত্তে মুই আদিবাসী

✍️ ০৯/০৮/২০১৬ইং

Spread the love
RannyePhul

Explore Chakma Literature, Culture & History

https://rannyephul.com

Leave a Reply

Your email address will not be published. Required fields are marked *