সে মিলেবো (চাকমা গল্প)

রেবেক ফুলুন য্যান ঝারত তুম্বাজ ছিদান, থিক কিঝু মানুজও আঘন যারা মনত তুম্বাজ ছিদান। ধুধুআঙুন য্যান অহ্’মা আগাজত দুও মেলি বাবোদা তাঙান, থিক সিক্কে গোরি কিঝু মানুজও আঘন যারা মনত দুও মেলি বাবোদা তাঙান। তারুম ঝারত য্যান নানান পেঘ হল’লব’ গোরি তারুম ঝারানরে ভোরেয় তুলন, কিঝু মানুজ আঘন যারা মনর তারুম ঝারানরে হল’লব’ গোরি ভোরেয় তুলন। এচ্যা সেধক্যা এক্কো মানুজর কধা কোম। তে মানুজ, তে মানুজী, তে সবনী, তে আঝাবী, তে সুঞ্জুগী, যে ম’ মনত, ম’ চোঘোত বেক্কানি ওই উত্থে লারে লারে গোরি। যিঙোরি এক্কো আজব’ সাবে জিববন গোচ্ছে এক্কো শিঘের’রে লারে লারে গিলি খাই, ঠিক সিক্কে গোরি তেও ম’ মনান, মরে গোদা বেক্কান তার গোরি জুরি লোয়্যে। এচ্যা সে কধানী লেঘিবাত্তে যেম- [ সে মিলেবো ]

সক্কে মুই খাগড়াছড়ি সরকারী কলেজত রাষ্ট্র বিজ্ঞান ডিপারমেন্টর বিএ অর্নাসর থুম বঝরর পোরবো এলুং। মুই চাদে অন্য সমাজ্যাউনসান সেধক ধগধাগ ন’ এলুং। অন্যজন’সান কলেজত সেধক সাজিগোজি ন’ যেদুং। সাজানা মানে ম’ সিধু অক্ত আ টেঙা দুনুগান খয় গরানা। ম’ আধত আমিঝে এক্কো নোট খাতা আ কলম থেদ’। যক্কে যিয়ান মনত উদিদো, গম লাগিদো সক্কে সিয়ানি লেঘি লেঘি থোধুং। অক্তে অক্তে দেয়ালিয়াত, ম্যাগাজিনত, পত্রিকেত কবিতা, গল্প, প্রবন্ধ লেঘিদুং বেনাঙে। য্যান কেয়োই ন’ চিনন, কেয়োই ন’ জানন। মুই ন’ চেধুং কেয়োই মরে চিনদোক, জানদোক। ম’ সিধু চিনানা, জানানাও একবাবত্যা অক্তর সুম মারানা ভিলি মনে অধ’। কেয়ো চিনিলে দাগিবাক, যা পরিবো। মাত্তর মুই বেরাদে অমহদ’ গম পেধুং। হালিক এ গম আ গম ন’ পানার ভজান ফারক। মুই গম পেধুং ঝারে ঝারে বেরাদে, জুরিয়ে, চাদারায়, জুমে জুমে, মোনে মোনে-। সেনাত্তে জীংহানি ঝাকবোদি কন’খেব ভোঙা ন’ লামং। এনেও মরে সিয়েনিত ন’ সাজে।

একদিন্যা ক্যান্টিনত কপি খা যেনেই মুই ম’ নোট খাতাবো মনত নেই গোরি ফেলে এচ্ছোং। সেদিন্যা বেক্কান তোগেনেয়্য সুপ ন’ পাঙ, দোলেদালে ইধোত তুলি বোরে ন’ এজং কুধু, কুবোত ফেলে এচ্ছোং সে খাদাবো। খাদাবো আহরেনে একবাবত্যা মনজাগুলুগত এলুং, বেগত্তুন বেজ দাঙর কধা অলদে সে নোট খাদাবোত ম’ নাঙান লেঘা আঘে ‘সমার’ গোরি। লেঘা আঘে পলিটিসিয়ানর উক্তি, বরবর লেঘগর উক্তি, হিলোত গণহত্যার তারিখ আ সাল, আ মর কিঝু কিঝু কবিতা। দর এল’ যুনি নোট খাতাবো চজ্জেদাগির আধত পরে সালেন মর বিএ থুম গরানা অধ’ নই। মাত্তর সিদিক্কে কন’ কিচ্ছুই ন’ অল’। ন’ অলহ্’দে অহলদে ম’ সে নোট খাতাবো এক্কো চাঙমা মিলেই পিয়্যে। তা’ পরর দিনত মরে তোগেয় তোগেয় তে মরে সে নোট খাদাবো এই ফিরেয় দিয়ে। সেদিন্যা সে নোট খাদাবো পেইন্যায় তারে কি কোইনে ম’র খুঝি ফগদাং গোরিম বুঝি ন’ পারং। সেদিন মলোই’ তার দেঘা উয়ে, তে ম’ চোঘোত ‘সে মিলেবো’। সেদিন্যা সে মিলেবো ম’র লেখ্যা এক্কো কবিতা মরেয় মাদেয় শুনেল’-

আগুন জলে চিরোহিত্যে, আগুন জলে মনত;
আগুন জলে কধায় কধায়, আগুন জলে সবনত
এ জলানা থামিদো নই, জুরেয় যেদ’ নই কনদিন
এ জলানা বেগিদো অব’, ফুরি উদিবো দিনেদিন।

এ মুরোল্যার বুঘত, জুমানি পুরি পুরি ছেই অর;
অসিজির আগুন জুলি আঘে, মুরোল্যাত ফুদের দর
ভুইজাগা, আদাম ভরন্দি কারি কারি নিদন য়েমান
জাগি উধো ঘুম্য মানেয়, ওজোরেয়দি য়েমানর জেমান।

কবিতাবো মাদে ফুরেলে মরে চেই আঝিল’। তা’ আঝিবো দেঘি এক্কা লাজেলুং মুই। মরে কল’ ম’ নাঙান ‘জুমবী’। এ নাঙান ম’ বেভেয় আয়োজে থোইদিয়ে, মরে কয় জুম্ম ঘরত জনম লোয়োচ সেত্তে ত’ নাঙান ‘জুমবী’ থোই দোঙে। মুই যক্কে ম’ নাঙান কবাত্তে জুক্কেলেলুং সক্কে মরে, ত’ নাঙান এ নোট খাতাবোত আঘে কুয়ো ন’ পরিবো। তারে পুঝোর লোলুং কলেজত তে কন ডিপারমেন্টত। তে কল’ তে এ খেব ইন্টারত্তুন ফাইনাল দিবো। মনে মনে ভাবিলুং এ চিগোন মিলে স’বো ভজান ঝাদি মিঝিল’ মলোই। দর নেই তার, কোই পারে মুই কলেজত মুই তার সিনিয়র মাত্তর সিন্দি তার কন’ উজ নেই।

বেল্যা মাধান পরান্তুলোই আদামর কালভাট্টোত বঝি কধা কধে কধে তারে সে কধা কোলুং। পরান্তু আদামর সমাজ্যা ভিদিরে যারে মুই বিচ্ছেচ যেই পারং, যাং। তেও মরে যেই পারে, যায়। আমা রাঙাপানিছড়া আদামান দাঙর এক্কান আদাম। খাগড়াছড়ি সদর ভিধিরেই পোচ্ছে। ভুই, মুরো বেক্কানিদি ভরনভিরোন কলে সুয়ায়। ভরন্দি এক্কান আদাম। আদামর সংমোধ্যা এক্কান বিহার আঘে যিওত আমি নিত্য বুদ্ধ বন্দনা, ভান্তে বন্দনা গোরিয়োই। পরান্তু আমক গোরি মরে পুঝোর লো ধোরিল’।

– মিলেবোর নাঙান কি?
– মিলেবোর নাঙান ‘জুমবী’। এ নাঙর পিঝেদি এক্কান কায়িনীও আঘে।
– কেধক্যা কায়িনী?
– তা’ বেভেদাগি নাহি তারে কোয়োন্দে জুম্ম ঘরত জনম কেনায় ‘জুমবী’ নাঙান থোই দোন্দে।
– আ গম উয়ে দ’। দোল নাঙ। চাঙমা নাঙ। এনে এবারা নাঙানী শুনিলে বাঙাল’ নাঙ।
– অয় ভেই, দোল কধা কোয়োচ। য্যান চা আজু নাঙান মোনচান, বা’ নাঙান ফুল চান!
– ইরুক দিনত মানুচ্ছুন চাঙমা নাঙানি পুরি ফেলাদন। যেধক শিক্খেয় চোঘ ফুধোদন সেধক নাঙানি বেজাদর ঘজা ওই উধের।
– অয়, অয় ঠিক কধা কলে। আর’ ভিলে লাজান। চাঙমা কধা কোই ন’ জানং কন। কোই পারচ এধক্যা মানুজ আমা সদর’ ভিদিরে অভেদর।
– অয় অয় ভেই।

বগাঝাক্কুন উরি যাদন, বেলান পজিমো মোনত আভর খেই আঘে। ইক্কে তা’ জোতিয়ান আগসান তেজ  নেই। বেলানর তেজও বুড়ো ওই উত্যা। পরান্তুলোই দ্বিজনে বোই আঘি কালভাট্টোত। জুরো জুরো নাঙেল’ বোয়ের এই কিয়েত বাজি যার। মর মনে কর কবিতা লেঘিবার, নোট খাতাবো খুলি কলম্মো ধোরি লিঘিবার কমল বোজেলুং।

বেল্যা লামি এলে ফিরি এযন পেঘে বাঃত;
বেলানর তেজ কমি এযে, উধি যায় কালাত-
য়েলানি মেলে যায় লারে লারে সধগর সমারে
তারাউন ভাজাদোন আগাজত রেত্তো খুজ ফেলানার সমারে।

কলেজত গেলে জুমবীলোই দেঘা অয়। দাধা গোরি কায় দাগি এযে। চিগোন এক্কো মিলে, এব’ সেধক্যা কিচ্ছু ন’ বুঝে। তারে  দেঘি মনে অয় তারা ঘরত তারে নোনেয়্যা গোরি পালাদন। যার দুঘ সয্য গোরিবের কন’ খেমতা ন’ অয় এব’। মরে আমিঝে কুজোলি গরে ম’ লেখ্যা কবিতাউন তারে শুনেবাত্তে। মুই শুনেবার ন’ চাঙ বিজুংবাজাং গরং, মাত্তর মিলে স’বো এধক নোনেয়্যা ন’ শোনেয় ন’ পারং। মিলেবো এ বঝর ইন্টারর সায়েন্স ডিপারমেন্টত্তুন ফাইনাল পরীক্ষে দিবো, মুইও দিম রাষ্ট্র বিজ্ঞানর ডিপারমেন্টত্তুন। কনদিন এধক্যা গোরি কন’ মিলেই নোনেয়্যা গোরি কধা ন’ কনাত্তে নোনেয়্যা র’উনর অত্থগান মুই বুঝি উধি ন’ পারং এ যাবত। মাত্তর জুমবীরে লাঘত পানার পরেদি সিয়ান দোলেদালে বুঝি পারঙর। তে য্যান আগুন মাঝত মোন’ ঝারত ফুত্যা ভুলোং ফুল, আ ন’ অলে চেঙে পারত ফুত্যা কেচ্চেফুল। তে কেচ্চেফুলোসান এধক নরম তারে কন’ দুঘ দি পাত্ত নই, তক্কানত ভাঙি পোরিবো। তারে দেঘি অক্তে অক্তে মনে অয় জুমত লোই বেরা নেযাং। মাত্তর সিয়ান অধ’ নই, তার মুজোঙে পরীক্ষে, মরও।

এচ্যা এ কধানী চিদে গত্তে ভজান গম লাগে। কেত্তে কোই পারচ? যে মিলেবো পল্যা ম’ কবিদে মাদেয় ম’ কায় এই, ম’লোই মনবানত গিত বান্যে, সে মিলেবোই এচ্যা ম’ ঘরর ঘরনী। তাত্তেই এচ্যা ঘরান দোলেদালে সাজি আঘে, মেদেনীত উতু বদলিলে য্যান পাকাতির রূপরংধক বদলায়, মাত্তর তার রূপরংধক কিচ্ছুই মত্তেই ন’ বদলায়। তে য্যান এব’ সে চিগোন মিলেবো, যে ক্যান্টিনর টেবিলত ম’ নোট বোইবো তোগেই পিয়ে। যারে একসলা ভাবিদোং তার দুঘ সোয়েবার খেমতা নেই, ভাঙি পরিবো, গলি পরিবো মাত্তর তে এচ্যা ঘরর সয়সাগর কাম নিচিদে, নিমোনগোরি গোরি যার। ধরি রাঘেয়্যে গিরিত্তিবো দোলেদালে। যুনি এখেব আগ’সান কবিদে, গল্প, কধাপাজন লেঘানা ন’ অহ্’য় মর, মাত্তর মনে মনে কয় আঝার কধা থুবেয় থোয়োং তার ইজেব কি কন’ বন্দায় দি পারিবাক?

পরান্তুরে আহ্’রেয় জীংহানির গঙারত যেবাবত্যা গঙমরি যিয়ে, জীংহানিরে যে গ্যাজ মরি যিয়ে সিয়েন মুই বাদে কন’ বন্দায় কোই ন’ পারন। কোই ন’ পারে ম’ জুমবীও। তুও জুমবীর নোনেয়্যা, মিধে কধা, নাগর আঝি মরে গঙারত রাঘেয়্যে দচ্ছো বঝর ধরি। অক্তে অক্তে স্টিফেন হকিঙরে দেঘি চিদোবল তোগে পাঙ, মাত্তর এ তুজুরো দেঝত কি সে চিদোবল ব্যাজ থিধো ওই পারে?  যে দেঝত বিগজে মাদিবের এলেট নেই, যে দেঝত বিজগে লেঘিবের এলেট নেই, সে দেঝত কি চিদোবল থিধোগোরি থেই পারে! এ আঙোচ্ছের আন্ধারত জুনি পুগর ঝিমিত ঝিমিত জলনিত পত্থান কি তোপ সুপ পানা ন’ অহ্’ব? নাঙ ন’ পেয়্যা কয় কবি, লেঘিয়ে-লেঘিবার যেনেই আদুর অহ্’লাক, পরান আহ্’রেলাক তা বাত্তা কি আমি বন্দায় রাঘেয়?

এ আদুরো জীংহানিরে লোই এচ্যা পুরোনর মিধেতিদে, সুঘদুঘর কধানী ফুধোফুধো গোরি র’ত সাজেয়, র’অত্তুন কধাথুপ সাজেয়, কধাথুপ্পুন চিনমাজারায় ফগদাং গোরিলুং। কন্না বুঝিবো, কন্না গভীনত দুবিবো, কন্নাইবা হিজি উধিবো কোই ন’ পারং। মাত্তর জীংহানিয়ান দ’ আমনর গায় নই, আমনর গায়ত্তে নই। বেগত্তে, দঝত্তে, দেঝত্তে, জাদত্তে। সেত্তেই বাজি থানা, সেত্তেই লারেয় গোরি যানা আমনর সমারে আমনে, বেগর সমারে আমনে, কেয়্যার সমারে মনে। তুও সবন দেঘানা জুমবী নাঙর নোনেয়্যা সমারত্তে, তগলক, কবরক, ফাওনী নাঙর পুও-ঝিলগত্তে। সে মিলেবোর কধানী কোইনে ফুরে দ’ নই, কধে কধে কধক কধা ন’ কোইনে থে যায়, কধে কধে কধক কধা নিজেনির মুরোত্তুন দেবা ঝিমিলানীসান ঝিমিঝোত মেলে যায়, তার ইজেব নেই।

এব’ আগ’সান ইত্তুক ইত্তুক বগাঝাক উত্তরে উরি যান বেল দুবোনির সলাত, বোয়েরান  কেয়্যাত বাজি যায়, পুরন দিনুন মাদে যান। মুই মিঝি যাঙ জুমবীর আল্লেঙত, গাবুরর নিজেনিত, ফেলে এচ্ছে খেনত। মাত্তর নুও দিনুন আগাত্যে ওই গিলিপ গোরিবাত্তে এযদন, তারার গিলিপ থোরিবার চিদোবল, কেয়্যাবল মর কত্তমান আঘে কোই ন’ পারং। মাত্তর, পুও-ঝিলগরে সে দিনত্তে প্যাজি গোরিবার চাঙ। তারা তিগি থাধোক, আঘুনর তাবে তাবে, গুলির মুয়ে মুয়ে, খেবখেববদলর সমারে সমারে, আমন’ নাঙে, আমন ওই। সে মিলেবোর বেগ মনঝোক তজিম ওক পোত্যা বেলর পহরে। আন্ধার কাদি গেলে কধা কনাও ফুরেব’ মনর, খাদার আ কলমর।

সে মিলেবো

গল্পকার: সধরক

Spread the love
RannyePhul

Explore Chakma Literature, Culture & History

https://rannyephul.com

Leave a Reply

Your email address will not be published. Required fields are marked *