হোচপানা (চাকমা কবিতা)

– বাসু দেব চাকমা

দি চোগোর আন্দল অলে
মনানে তোগায় তরে,
যুদি মুজুঙোত এজস
পরানান বিরুং বিরুং গরে!
ইয়ান যুনি হোচপানা অয়-
সালেন হোচপাং।
অহুর ঘুমোত মর সবনানি
সাজি উদে তরে নিনেই,
বারিজের ঝড়ত ভিজিবার মনে হয়
তর-মর আদে আহ্ত দুরিনেই!
ইয়ান যুনি হোচপানা অয়
সালেন হোচপাং।
তর চোগে চোখ রিনি চেলে
রিবেঙোত ত ফুদে,
ত মুয়োত আঝি দেলে
মর মন হুজিয়ে ভুরি উদে।
ইয়ানোই যুনি হোচপানা অয়-
সালেন হোচপাং।
তরে দেলে মনে অয়
ভালুক বজর ধুরি তুই মর সদর,
ভাবিবার নচাং তো মনানে হয়
জিংহানি হাদেই তল্লোই আর আজার বজর!
ইয়ানোই যুনি হোচপানা অয়-
সালেন হোচপাং।
হোচপানা হারে হয় নচিনোং
তো হবার মনে হয় হোচপাং,
মনত যুদি হিজু লেগা থায়
ত নাঙ তোগে পাং!
ইয়ানোই যুনি অয় হোচপানা
সালেন তরে হোচপাং হোচপাং।

Spread the love
RannyePhul

Explore Chakma Literature, Culture & History

https://rannyephul.com

One thought on “হোচপানা (চাকমা কবিতা)

Leave a Reply

Your email address will not be published. Required fields are marked *